Si Szinpin Shimoliy Koreyaga boradi

Xitoy yetakchisi Si Szinpin kelasi hafta qariyb yetti yil ichida ilk marta Shimoliy Koreyaga safar qiladi.

Ushbu safar Xitoyning yadroviy qurolga ega qo‘shnisi bilan yaqin aloqalarini mustahkamlash yo‘lidagi qator sa’y-harakatlarining biridir.

Shimoliy Koreya rahbari Kim Chen In so‘nggi yillarda Rossiya bilan yaqinlashib, Ukrainaga qarshi urushini qo‘llab-quvvatlash uchun qo‘shin va an’anaviy qurollar yuborgan edi.

Shuningdek, Kim Chen In o‘tgan yili Shimoliy Koreyaning eng yirik savdo hamkori va yordam manbayi bo‘lgan Xitoy bilan aloqalarni qayta tiklashga harakat qildi.

“Shimoliy Koreya Rossiya bilan yaqinroq aloqalar o‘rnatayotgan bir paytda, Xitoy Pxenyan ustidan o‘z ta’sirini qayta tiklash va Shimoli-sharqiy Osiyodagi strategik manfaatlarini himoya qilish uchun foydalanishga harakat qilmoqda”, - dedi Xalqaro inqiroz guruhi tahlilchisi Uilyam Yang.

Si Szinpin tashrifi dushanbadan seshanbagacha davom etadi, deyiladi ikki davlat ommaviy axborot vositalarining qisqa xabarlarida. Uning oxirgi tashrifi 2019-yil iyun oyida bo‘lgan.

Shimoliy Koreya yadroviy bombalar uchun zarur komponentlarni ishlab chiqaruvchi yangi inshootni namoyish etganidan bir kun o‘tib ushbu tashrif haqida e’lon qilinmoqda. Janubiy Koreya harbiylari yangi yadroviy obyektni uranni boyitish zavodi deb hisoblamoqda.

Zavodning oshkor etilishi – Kim Si Szinpinning tashrifi arafasida mamlakatining yadro quroliga ega davlat sifatidagi maqomini mustahkamlashga qattiq intilganidan dalolat.

Kim 2019-yilda Tramp bilan o‘tkazilgan yuqori darajadagi muzokaralari barbod bo‘lganidan beri o‘z yadro arsenalini kengaytirishga intilmoqda.

Tramp diplomatik munosabatlarni tiklash istagini bir necha bor bildirgan, biroq Shimoliy Koreya rahbarining fikricha, buning uchun AQSH muzokaralarning boshlang‘ich sharti sifatida mamlakatning yadrosizlanishi haqidagi talabidan voz kechishi kerak.

Kreml bayonotiga ko‘ra, o‘tgan oy Pekinda bo‘lib o‘tgan uchrashuvda Putin va Si Shimoliy Koreyaning yakkalanishi, iqtisodiy sanksiyalar, harbiy bosim va xavfsizligiga tahdid  soluvchi boshqa usullarga qarshiligini bildirgan.

Qudratga kelgan ilk yillarida ko‘p safarlar qilgan Si COVID-19 pandemiyasidan keyin xalqaro tashriflarni keskin qisqartirdi. Uning so‘nggi chet el safari 2025-yilning kuzida Osiyo-Tinch okeani iqtisodiy hamkorlik sammiti uchun Janubiy Koreyaga bo‘lib, u yerda Tramp bilan suhbatlashgan.