«Yilning eng yaxshi devoriy surati – 2025» mukofotini Gretsiyadagi Mariya Kallas tasviri qoʻlga kiritdi

"Novdalar, qushlar va mevalar orasida tasvirlangan Mariya Kallas siymosi insoniyat va tabiat oʻrtasidagi aloqani ifodalaydi" deya taʼrif berilgan freskaga.

Asar muallifi Kleomenis Kostopulosning aytishicha, u suratni ikki haftada chizib tugatishni rejalashtirgan, ammo ob-havo noqulayligi sababli ish bir oyga choʻzilgan. Rassom freskani ishlash uchun maxsus moʻyqalamlar, boʻyoq ballonlari va koʻtarish kranidan foydalangan.

«Mariya Kallasning otasi Mesiniya (Gretsiya) mintaqasidan boʻlib, aynan shu narsa uni Kalamata timsoli sifatida tasvirlashga turtki boʻldi. Freska aslida «Mariya Kallas» emas, «Kalamata» deb nomlangan, niyatim shaharni allegorik tasvirlash edi», – deydi Kleomenis Kostopulos.

Rassom opera yulduzining shaxsiyatidan tashqari, uning kiyimiga ham alohida eʼtibor qaratgan. Uning soʻzlariga koʻra, suratdagi libos – Mesiniya mintaqasining tabiiy moʻl-koʻl boyliklari ramzidir. Shuningdek, freska Kalamataning 2030 yilga kelib iqlim neytral shahar boʻlish maqsadi bilan bogʻlangan.

Mutaxassislar fikricha, freskalar chiqindilarni kamaytirib bermasa-da, insonlarni oʻz xatti-harakatlarini oʻzgartirishga chorlab, kundalik hayotda ekologik meʼyorlarga rioya etishga undaydi.

Mahalliy hokimiyat yangi devoriy tasvirning sayyohlik yoʻnalishini rivojlantirishdagi rolini olqishladi. Hokimiyat vakilining aytishicha, freska allaqachon diqqatga sazovor markazga aylangan: odamlar uning fonida rasmga tushishyapti, freskani koʻrish uchun Kalamataga kelishmoqda va ijtimoiy tarmoqlarda reklama qilishmoqda.

Kleomenis Kostopulos Street Art Cities mukofotidan mamnun ekanligini bildirib, bir nechta shahar hokimliklari va boshqa tashkilotlar unga hamkorlik boʻyicha aloqaga chiqqanini aytdi. 

Muallif: Isomiddin Jumanazarov