2026 йилда иқтисодий ўсиш суръати секинлашиши кутилмоқда

Бу ҳақда 18 декабрь куни бўлиб ўтган Сенат мажлисида бош вазир ўринбосари, иқтисодиёт ва молия вазири Жамшид Қўчқоров маълум қилди.

Вазирнинг таъкидлашича, Халқаро валюта жамғармаси 2025 йил якунларига кўра Ўзбекистон иқтисодиёти 6,2 фоизга ўсишини прогноз қилган. Бироқ иқтисодий блок кутилмалари мазкур кўрсаткичдан юқорироқ шаклланган.

“2026 йилда иқтисодий ўсиш суръати 6,6 фоиз бўлиши, ялпи ички маҳсулот ҳажми киши бошига 4 минг доллардан ошиши кутилмоқда. Иқтисодий ўсиш кредит портфелининг 13 фоизга, асосий капиталга инвестицияларнинг 8,1 фоизга, олтинни ҳисобга олмаган ҳолда экспортнинг 15,1 фоизга ўсиши ҳисобига таъминланади”, — деди Жамшид Қўчқоров.

Шунингдек, прогнозларга кўра:

• бозор хизматлари — 14,5 фоиз,
• саноат ишлаб чиқариши — 6,4 фоиз,
• қурилиш соҳаси — 10,2 фоиз,
• қишлоқ хўжалиги — 4,2 фоиз ўсиши кутилмоқда.

Бош вазир ўринбосари келгуси йилда мамлакатда инфляция даражасини 7 фоиздан оширмаслик чоралари кўрилишини ҳам таъкидлади. Унинг сўзларига кўра, 2027 йил якунига келиб инфляция суръати 5–6 фоиз атрофида шаклланиши режалаштирилган.