«Оскар–2026»: энг яхши фильм учун асосий даъвогар аниқ

2026 йилги «Оскар» эса алоҳида эътиборга лойиқ, чунки тарихий рекорд янгиланади.

Номзодлар Беверли-Ҳиллздаги Сэмюэл Голдвин театрида бўлиб ўтган маросимда эълон қилинди. Тадбирни актёрлар Дэниел Брукс ва Льюис Пуллман олиб борди. Жами 24 та номинация бўйича даъвогарлар маълум қилинди.

«Оскар» тарихида янги рекорд

Райан Куглер суратга олган «Гуноҳкорлар» номли вампир драмаси 16 та номинация билан «Оскар» тарихида энг кўп номзод кўрсатилган фильмга айланди. Шу пайтгача рекорд 14 та номинация билан «Ҳамма Ева ҳақида», «Titanik» ва «La-La Land» фильмларига тегишли эди.

«Гуноҳкорлар» «Энг яхши фильм», «Энг яхши режиссёр», «Энг яхши актёр» (Майкл Б. Жордан), «Энг яхши оригинал сценарий» ҳамда бир қатор техник йўналишларда номзод сифатида кўрсатилди.

Етакчи фильмлар ва студиялар

13 та номинация билан Пол Томас Андерсоннинг «Жанг ортидан жанг» фильми иккинчи ўринда бормоқда. Warner Bros. студияси эса жами 30 дан ортиқ номинация билан ўз тарихидаги энг муваффақиятли мавсумлардан бирини қайд этди.

Шунингдек, «Франкенштейн», «Marty Supreme» ва «Sentimentalnaya sennost» фильмлари 9 тадан номинацияга эга бўлди. NEON мустақил студияси эса «Энг яхши халқаро фильм» йўналишида 5 та ўриндан 4 тасини эгаллаб, диққат марказида бўлди.

Энг яхши актёр ва актриса учун кураш

«Энг яхши актёр» номинациясида Тимоти Шаламе, Леонардо Ди Каприо, Майкл Б. Жордан, Итан Хоук ва Вагнер Моура ўртасида кучли рақобат кутилмоқда.

«Энг яхши актриса» номинациясида эса Жесси Бакли, Роуз Бирн, Кейт Ҳадсон, Рената Рейнсве ва Эмма Стоун номзод сифатида кўрсатилган.

73 ёшли британ актёри Делрой Линдо ўз фаолиятида илк бор «Оскар» номинациясига лойиқ кўрилди.

Янги номинация ва ўзгаришлар

2026 йилги маросимда 2001 йилдан бери илк бор янги — «Энг яхши кастинг» номинацияси жорий этилди. Шунингдек, овоз бериш тизимига ҳам ўзгартиш киритилди: энди академия аъзолари овоз беришдан олдин барча номзод фильмларни кўрганини махсус илова орқали тасдиқлаши шарт.

Номзодсиз қолганлар

Бу йилги энг катта сюрпризлардан бири «Wicked: For Good» фильмининг умуман номинация олмагани бўлди. Шунингдек, режиссёр Гильермо дель Торо, актёрлар Пол Мескал ва Чейз Инфинити ҳам рўйхатдан четда қолди.

Маросим қачон ўтади?

98-«Оскар» мукофотини топшириш маросими 2026 йил 15 март куни Лос-Анжелесдаги Dolby театрида бўлиб ўтади. Кечани машҳур комик Конан О’Брайен олиб боради. Маросим ABC телеканали ва Hulu платформасида жонли эфирда намойиш этилади.