9 ёшли болага жароҳат етказган ўсмирнинг онаси жаримага тортилди

Маълумотларга кўра, жорий йилнинг 4 октябрь куни тахминан соат 16:20 ларда Бектемир туманидаги 290-сонли мактаб ҳовлисида 2010 йилда туғилган С.А. ҳамда 2016 йилда туғилган Ф.А. ўртасида оғзаки жанжал келиб чиққан. Жанжал чоғида С.А. велосипедда кетиб бораётган Ф.А.ни оёғи билан тепиб юборган, натижада 9 ёшли бола йиқилиб жароҳат олган.

Суд-тиббий экспертиза хулосасига кўра, Ф.А. юз қисми, елка ва қўл соҳаларида енгил тан жароҳатлари олган. Бу жароҳатлар соғлиқни қисқа муддатга бузилишига олиб келувчи енгил тан жароҳати сифатида баҳоланган.

Ҳолат юзасидан терговга қадар текширув бошланган ва иш Тошкент шаҳар ИИББ раҳбарияти назоратига олинган.

Ҳозирда вояга етмаган С.А.нинг онасига нисбатан Маъмурий жавобгарлик тўғрисидаги кодекснинг 47-моддаси (“Болаларни тарбиялаш ва уларга таълим бериш бўйича мажбуриятларни бажармаслик”) асосида маъмурий баённома расмийлаштирилиб, у жаримага тортилди.

Шунингдек, мактаб маъмурияти ва ота-оналар билан профилактик тушунтириш ишлари олиб борилиб, бу каби ҳолатлар такрорланмаслиги учун тегишли чоралар кўрилди.