9 yoshli bolaga jarohat yetkazgan oʻsmirning onasi jarimaga tortildi

Maʼlumotlarga koʻra, joriy yilning 4 oktabr kuni taxminan soat 16:20 larda Bektemir tumanidagi 290-sonli maktab hovlisida 2010 yilda tugʻilgan S.A. hamda 2016 yilda tugʻilgan F.A. oʻrtasida ogʻzaki janjal kelib chiqqan. Janjal chogʻida S.A. velosipedda ketib borayotgan F.A.ni oyogʻi bilan tepib yuborgan, natijada 9 yoshli bola yiqilib jarohat olgan.

Sud-tibbiy ekspertiza xulosasiga koʻra, F.A. yuz qismi, yelka va qoʻl sohalarida yengil tan jarohatlari olgan. Bu jarohatlar sogʻliqni qisqa muddatga buzilishiga olib keluvchi yengil tan jarohati sifatida baholangan.

Holat yuzasidan tergovga qadar tekshiruv boshlangan va ish Toshkent shahar IIBB rahbariyati nazoratiga olingan.

Hozirda voyaga yetmagan S.A.ning onasiga nisbatan Maʼmuriy javobgarlik toʻgʻrisidagi kodeksning 47-moddasi (“Bolalarni tarbiyalash va ularga taʼlim berish boʻyicha majburiyatlarni bajarmaslik”) asosida maʼmuriy bayonnoma rasmiylashtirilib, u jarimaga tortildi.

Shuningdek, maktab maʼmuriyati va ota-onalar bilan profilaktik tushuntirish ishlari olib borilib, bu kabi holatlar takrorlanmasligi uchun tegishli choralar koʻrildi.