«Антикоррупция» сайти мухбири 4 йилга озодликдан маҳрум этилди

Бу ҳақда Фарғона вилояти судлари ахборот хизмати маълум қилди.

Қайд этилишича, 2026 йил 20 январь куни Марғилон шаҳар судида аввал судланган, мухбир сифатида фаолият юритган Элёр Тожибоевга нисбатан жиноят иши кўриб чиқилиб, унга ҳукм ўқилган.

Суд қарорига кўра, Элёр Тожибоев Жиноят кодексининг олти моддаси бўйича айбдор деб топилди. Жумладан, у:

• туҳмат қилиш,
• ҳақоратлаш,
• товламачилик,
• ҳокимият вакилига ёки фуқаровий бурчини бажараётган шахсга қаршилик кўрсатиш,
• ёлғон ахборот тарқатиш,
• шунингдек, ҳужжатлар, штамплар, муҳрлар, бланкалар ҳамда автотранспорт воситалари давлат рақам белгилари билан боғлиқ жиноятларни содир этганликда айбли деб топилди.

Суд томонидан унга нисбатан Жиноят кодексининг 59 ва 61-моддаларига асосан 3 йил 10 ойлик жазо, шунингдек, 60 ва 61-моддаларига мувофиқ илгари муддатидан олдин шартли озод қилингани бекор қилиниб, жами 4 йил муддатга озодликдан маҳрум қилиш жазоси тайинланди.

Элёр Тожибоев тайинланган жазони қаттиқ тартибли колонияда ўташи белгиланди.

Маълумот учун, ушбу шахс 2021 йилда ҳам Жиноят кодексининг тергов ёки суд ишларига аралашишни назарда тутувчи моддаси билан айбдор деб топилиб, 3 йилга озодликдан маҳрум қилинган. У ўша вақтда «Effect.uz» сайтининг собиқ, «Taftish.uz» сайтининг эса амалдаги мухбири бўлган.