АҚШ БМТ Хавфсизлик кенгашини Сурияга нисбатан санкцияларни юмшатишга чақирди

Дипломатнинг таъкидлашича, бу қадам Сурия халқининг яшаш шароитини яхшилаш учун муҳим аҳамиятга эга.

Яқин Шарқдаги вазият ва Суриядаги воқеаларга бағишланган йиғилишда сўзга чиққан Уолтц, санкцияларни фуқаролар манфаати йўлида қайта кўриб чиқиш лозимлигини билдирди.

Унинг сўзларига кўра, Сурия ҳукумати АҚШ президенти Дональд Трампнинг санкция босимини енгиллаштириш ҳақидаги баёнотидан кейин очилган имкониятлардан фойдаланиши зарур.

«Шу муносабат билан биз Хавфсизлик кенгашини Сурияга нисбатан БМТ санкцияларини юмшатишга қаратилган ҳаракатларни қўллаб-қувватлашга чақирмоқдамиз. Жумладан, 1267-сонли резолюция доирасида айрим суриялик раҳбарларга нисбатан қўлланилган чекловларни бекор қилиш имкониятини кўриб чиқиш лозим», — деди Уолтц.

Америкалик вакил таъкидлашича, Сурия ҳукумати учун хавфсизлик, барқарорлик ва аҳоли фаровонлигини таъминлаш каби муҳим вазифалар турибди.

Унинг фикрича, мамлакат тараққиёти кўп жиҳатдан халқаро ҳамкорлар ёрдамига боғлиқ, шу боис Дамашқнинг қўшни давлатлар билан алоқаларни мустаҳкамлаш бўйича ҳаракатлари қўллаб-қувватланмоқда.

Уолтц, шунингдек, АҚШ Суриянинг қўшни мамлакатлар билан муносабатларни тиклаш жараёнида ёрдам беришни давом эттиришини билдирди ва Саудия Арабистони, Қатар, Туркия ҳамда Иорданиянинг Сурия институтлари ва иқтисодиётини ривожлантиришга қаратилган ташаббусларини олқишлади.