Жеффри Эпштейн иши: асосий воқеалар ва янги ошкоралик

2008 йили Эпштейн Флорида штатдаги иш бўйича суд билан келишувга бориб, енгил жазо олган. Бу қарор кейинчалик жамоатчилик ва ҳуқуқ фаоллари томонидан кескин танқид қилинди, чунки у кенг қамровли жиноятлардан амалда қутулиб қолгани айтилди.

2019 йили Эпштейн Нью-Йоркда одам савдоси ва жинсий эксплуатация билан боғлиқ федерал айбловлар асосида қайта ҳибсга олинди. Тергов материалларида у турли мамлакатлардан бўлган қизларни молиявий ва маиший ёрдам орқали ўзига боғлаб қўйгани қайд этилган.

2019 йил август ойида Эпштейн қамоқхонада ўлик ҳолда топилди. Расмий хулосада ўлим сабаби ўз жонига қасд қилиш деб кўрсатилган бўлса-да, бу ҳолат жамоатчилик орасида кўплаб саволлар ва шубҳаларни келтириб чиқарди.

Кейинги йилларда суд материаллари ва тергов ҳужжатлари босқичма-босқич ошкор қилинмоқда. Уларда Эпштейн билан алоқада бўлган шахслар, молиявий ўтказмалар ва ёзишмалар акс этган.

Самарқандлик қиз билан боғлиқ ёзишмалар

Оммавий ахборот воситаларига сизиб чиққан навбатдаги ҳужжатларда Эпштейннинг Самарқанд вилоятидан бўлган қиз билан ёзишмалари ҳам тилга олинади. Ҳужжатларга кўра, у қизнинг Париждаги таълими, турар жойи, авиачипталари ва бошқа харажатларини қоплаб берган.

Шунингдек, Ўзбекистондаги банк ҳисоб рақамига 5400 АҚШ доллари ўтказиб берилгани қайд этилган. Ёзишмалар мазмуни ва молиявий ҳаракатлар Эпштейннинг турли давлатлардан бўлган ёш аёлларни молиявий жиҳатдан қарам қилиб қўйиш амалиёти мавжуд бўлгани ҳақидаги даъволарни яна бир бор кучайтирмоқда.