АҚШ виза учун гаров пули талаб этиладиган давлатлар рўйхатини кенгайтирди

 Бу ҳақда Associated Press хабар берди.

Маълум қилинишича, ҳозирда рўйхатда 13 та мамлакат мавжуд бўлиб, уларнинг икки тасидан ташқари барчаси Африка қитъасида жойлашган. Янгиланган рўйхатга Бутан, Ботсвана, Марказий Африка Республикаси, Гвинея, Гвинея-Бисау, Намибия ва Туркманистон киритилган.

Қайд этилишича, мазкур қарор Доналд Трамп маъмуриятининг АҚШга кириш талабларини кучайтиришга қаратилган навбатдаги чораси ҳисобланади.

Янги тартибга кўра, виза олишни истаган шахслар билан юзма-юз суҳбатлар ўтказилади, уларнинг ижтимоий тармоқлардаги фаолияти текширилади, шунингдек, ариза берувчилар ўзлари ва оила аъзоларининг аввалги сафарлари ҳамда турмуш шароитлари ҳақида батафсил маълумот тақдим этиши лозим бўлади.

АҚШ расмийларининг билдиришича, виза учун гаров пули жорий этилиши мақсадли давлатлар фуқароларининг виза муддати тугагач мамлакатда ноқонуний қолиб кетишининг олдини олишга қаратилган. Гаров пули визанинг берилишини кафолатламайди, аммо виза рад этилган тақдирда ёки ариза берувчи виза шартларига риоя қилганини исботласа, тўланган маблағ қайтарилади.

Эслатиб ўтамиз, виза учун гаров тизими илк бор Мавритания, Сан-Томе ва Принсипи, Танзания, Гамбия, Малави ва Замбия фуқароларига нисбатан жорий этилган эди.