AQSh viza uchun garov puli talab etiladigan davlatlar roʻyxatini kengaytirdi

 Bu haqda Associated Press xabar berdi.

Maʼlum qilinishicha, hozirda roʻyxatda 13 ta mamlakat mavjud boʻlib, ularning ikki tasidan tashqari barchasi Afrika qitʼasida joylashgan. Yangilangan roʻyxatga Butan, Botsvana, Markaziy Afrika Respublikasi, Gvineya, Gvineya-Bisau, Namibiya va Turkmaniston kiritilgan.

Qayd etilishicha, mazkur qaror Donald Tramp maʼmuriyatining AQShga kirish talablarini kuchaytirishga qaratilgan navbatdagi chorasi hisoblanadi.

Yangi tartibga koʻra, viza olishni istagan shaxslar bilan yuzma-yuz suhbatlar oʻtkaziladi, ularning ijtimoiy tarmoqlardagi faoliyati tekshiriladi, shuningdek, ariza beruvchilar oʻzlari va oila aʼzolarining avvalgi safarlari hamda turmush sharoitlari haqida batafsil maʼlumot taqdim etishi lozim boʻladi.

AQSh rasmiylarining bildirishicha, viza uchun garov puli joriy etilishi maqsadli davlatlar fuqarolarining viza muddati tugagach mamlakatda noqonuniy qolib ketishining oldini olishga qaratilgan. Garov puli vizaning berilishini kafolatlamaydi, ammo viza rad etilgan taqdirda yoki ariza beruvchi viza shartlariga rioya qilganini isbotlasa, toʻlangan mablagʻ qaytariladi.

Eslatib oʻtamiz, viza uchun garov tizimi ilk bor Mavritaniya, San-Tome va Prinsipi, Tanzaniya, Gambiya, Malavi va Zambiya fuqarolariga nisbatan joriy etilgan edi.