БМТ Бош котиби Ғазо сектори ва Суданда Рамазон ойида ўт очишни тўхтатишга чақирди

Рамазон бутун дунё мусулмонлари тинчлик, тотувлик ва бирдамлик қадриятларини нишонлайдиган ва тарқатадиган ойдир, аммо Ғазода қотилликлар, портлашлар ва қон тўкилишлар давом этмоқда, деди БМТ раҳбари.

“Мен Рамазон руҳини ўт очишни тўхтатиш ва инсонпарварлик ёрдамини керакли тезлик ва миқдорда етказиб бериш йўлидаги барча тўсиқларни бартараф этиш орқали улуғлашни қатъий талаб қиламан”, - деди Гутерриш журналистларга.

Унинг қайд этишича, у БМТ Бош котиби бўлган даврда тинч аҳолини ўлдириш ва вайронагарчиликлар мисли кўрилмаган даражага етган.

БМТ Бош котибининг фикрича, халқаро гуманитар ҳуқуқ вайронага айланган. У Исроилнинг Рафаҳга ҳужум қилиш хавфи Ғазо аҳли учун жуда фалокатли бўлиши мумкинлигидан огоҳлантирди.

А. Гутерриш, шунингдек, Суданни Рамазон ойида ҳарбий ҳаракатларни тўхтатишга чақирди.

"Очлик, даҳшат ва ақл бовар қилмайдиган қийинчиликларга дуч келаётган Судан халқи учун жанглар тугатилиши керак", - деди у.

"Мен бутун дунёдаги сиёсий, диний ва жамоат раҳбарларини ушбу муқаддас давр ҳамдардлик, ҳаракат ва тинчлик даврига айланиши учун қўлларидан келганини қилишга чақираман", деди у.