Жаҳонгир Отажоновни алдаган дўсти 8 йилга озодликдан маҳрум этилди

Судда аниқланишича, томонлар 2003–2009 йилларда Ўзбекистон давлат консерваториясида ўқиб юрган даврда танишган. Отажонов айбланувчини тўтинган ука сифатида қабул қилгани, бироқ у ишончни суистеъмол қилиб, жами 195 минг долларлик зарар етказганини маълум қилди.

Текширувда қуйидаги ҳолатлар аниқланди:

• Lexus автомобил бўйича: 68 минг долларлик машина учун 34 минг доллар тўлаб, қолганини бермаган ва транспортни бошқа шахс номига расмийлаштирган (2017 йил).
• Гонорарлар бўйича: Тошкент ва Қашқадарёдаги тўйларда хонандага берилган 1 000 ва 5 000 доллар гонорарларни ўзлаштирган (2019 йил).
• BMW бўйича: 83 минг доллар деб олган, 15 минг доллар тўлаб, қолганини тўламаган ҳамда автомобилни бошқага расмийлаштирган (2021 йил).
• Тошкентдаги уйлар бўйича: Юнусобод ва Яккасаройдаги бир нечта кўчмас мулк операциялари орқали 87 минг долларга яқин зарар етказган (2021–2022 йиллар).

Судда Х.Ҳ. айбини тўлиқ тан олди ва маблағларни санъат фаолияти учун сарфлаганини билдирди.

Ҳукмга кўра:

• Х.Ҳ. 8 йилга озодликдан маҳрум этилди;
• Жаҳонгир Отажонов фойдасига 2 млрд 337 млн сўм ундирилади;
• Айбланувчи номидаги Тошкентдаги 2 та хонодон жиноят йўли билан орттирилган мулк сифатида мусодара қилиниб, сотувдан тушган маблағ зарарни қоплашга йўналтирилади.