Қозоғистонга кириш пуллик бўлади

Қўшни давлатга кириш учун энди олдиндан рухсатнома олиш талаб қилинади. 1 ноябрдан бошлаб самолётда Қозоғистонга келаётганлар учун электрон рухсатнома (ETA) мажбурий бўлади. 
15 ноябрдан эса талаб кенгаяди. 

Бу сафар у автомобилда ёки автобусда ЕОИИ (Евроосиё иқтисодий иттифоқи) ташқи чегарасини кесиб ўтувчиларга ҳам тегишли бўлади. Бунга Қозоғистоннинг Хитой, Туркманистон ва Ўзбекистон билан чегараси киради. Демак, машинада Шимкент ёки Олмаотага борадиган ўзбекистонликлар ҳам бу тартибга бўйсунади.

Нархи қанча?

Расмий тариф ҳозирча Қозоғистон ҳукумати томонидан эълон қилинмаган. Бироқ Сербия Ташқи ишлар вазирлиги ўз фуқаролари учун тарқатган маълумотга кўра, рухсатнома нархи ариза бериш вақтига боғлиқ бўлади. Чегарага етиб келишдан камида 72 соат олдин ариза берилса, нарх тахминан 3900 тенге (100 минг сўмга яқин) бўлади. Агар тўлов чегарада амалга оширилса, нарх икки баравар ошиб, 7800 тенгени (200 минг сўмга яқин) ташкил этади.

Рухсатнома 180 кунга берилади. Шу муддат ичида мамлакатга бир неча марта кириш мумкин. Ариза QazETA рақамли платформаси орқали топширилади.

Ҳозирча синов даври

25 августдан 1 ноябргача тизим тест режимида ишлайди. Бу даврда хорижликлар рухсатномасиз ҳам киришлари мумкин. Аммо чегарачилар кейинги сафар рухсатнома зарурлигини огоҳлантирмоқда.

Тартиб бу билан тугамайди. 30 ноябрдан талаб Россия ва Қирғизистон билан чегараларга ҳам тарқалади. 15 декабрдан эса денгиз ва темир йўл ўтиш пунктларини қамраб олувчи сўнгги босқич бошланади.

Кўплаб ўзбекистонликлар Қозоғистон орқали Россияга қатнайди. Улар учун бу қўшимча харажат ва ҳужжат бўладими — бу масала ҳали аниқ эмас.