Qozog'istonga kirish pullik bo'ladi

Qo'shni davlatga kirish uchun endi oldindan ruxsatnoma olish talab qilinadi. 1 noyabrdan boshlab samolyotda Qozog'istonga kelayotganlar uchun elektron ruxsatnoma (ETA) majburiy bo'ladi.

15 noyabrdan esa talab kengayadi. Bu safar u avtomobilda yoki avtobusda EOII (Yevroosiyo iqtisodiy ittifoqi) tashqi chegarasini kesib o'tuvchilarga ham tegishli bo'ladi. Bunga Qozog'istonning Xitoy, Turkmaniston va O'zbekiston bilan chegarasi kiradi. Demak, mashinada Shimkent yoki Olmaotaga boradigan o'zbekistonliklar ham bu tartibga bo'ysunadi.

Narxi qancha?

Rasmiy tarif hozircha Qozog'iston hukumati tomonidan e'lon qilinmagan. Biroq Serbiya Tashqi ishlar vazirligi o'z fuqarolari uchun tarqatgan ma'lumotga ko'ra, ruxsatnoma narxi ariza berish vaqtiga bog'liq bo'ladi. Chegaraga yetib kelishdan kamida 72 soat oldin ariza berilsa, narx taxminan 3900 tenge (100 ming so'mga yaqin) bo'ladi. Agar to'lov chegarada amalga oshirilsa, narx ikki baravar oshib, 7800 tengeni (200 ming so'mga yaqin) tashkil etadi.

Ruxsatnoma 180 kunga beriladi. Shu muddat ichida mamlakatga bir necha marta kirish mumkin. Ariza QazETA raqamli platformasi orqali topshiriladi.

Hozircha sinov davri

25 avgustdan 1 noyabrgacha tizim test rejimida ishlaydi. Bu davrda xorijliklar ruxsatnomasiz ham kirishlari mumkin. Ammo chegarachilar keyingi safar ruxsatnoma zarurligini ogohlantirmoqda.

Tartib bu bilan tugamaydi. 30 noyabrdan talab Rossiya va Qirg'iziston bilan chegaralarga ham tarqaladi. 15 dekabrdan esa dengiz va temir yo'l o'tish punktlarini qamrab oluvchi so'nggi bosqich boshlanadi.

Ko'plab o'zbekistonliklar Qozog'iston orqali Rossiyaga qatnaydi. Ular uchun bu qo'shimcha xarajat va hujjat bo'lish-bo'lmasligi haqida ma'lumot berilmagan.