Элдор Шомуродов яна Конференциялар Лигасида – бу сафар “Истанбул Башакшеҳир” билан

Ўтган мавсум УEФА Конференциялар Лигасида “Истанбул Башакшеҳир” 6 учрашувда атиги битта ғалаба ва 3 дуранг қайд этиб, 26-ўринни эгаллаган ва плей-офф босқичига йўл ола олмаганди. Эндиликда, ўз вақтида бу мусобақада чемпионликни қўлга киритган Элдор Шомуродов яна ушбу турнирда майдонга тушади — бу сафар Туркия клуби сафида.

2022 йилда “Рома” таркибида Конференциялар Лигаси тарихидаги илк ғолиб бўлган Шомуродов, финалда “Фейноорд” устидан 1:0 ҳисобидаги ғалаба қозонган эди. У бутун турнир давомида 9 ўйинда майдонга тушиб, 2 бор голли узатма муаллифи бўлган. Европа Лигасида эса Элдор 10 ўйинда 3 та гол уриб, 1 та голли узатма қайд этган.

“Башакшеҳир” 2025/26 йилги УEФА Конференциялар Лигасининг иккинчи саралаш босқичида иштирок этади. Уларнинг илк рақиби — Болгариянинг “Черно Море” клуби бўлади. Беллашув 24 июл куни, Тошкент вақти билан соат 22:00 да, Варна шаҳрида бўлиб ўтади. Бу жамоалар тарихда илк марта ўзаро тўқнаш келишмоқда.

“Башакшеҳир” ёзги тайёргарлик жараёнида ижобий натижалар қайд этди, бироқ бу баҳс улар учун янги мавсумдаги илк расмий синов бўлади.

“Черно Море” эса айнан шу босқичда ўтган йили мусобақани тарк этганди. Бу сафар улар ўз майдонида, ўз мухлислари қаршисида ғалаба қозонишга ҳаракат қилади. Болгария клуби тайёргарлик доирасида ўтказган сўнгги етти ўйинда кетма-кет ғалаба қозонган. Ички чемпионатни эса “Локомотив Софиа” билан 1:1 ҳисобида бошлади.