Трамп санкциялари сабаб “Роснефть” ва “Лукойл” 5,2 млрд долларга арзонлади

Россиянинг икки йирик нефть компанияси — “Роснефть” ва “Лукойл” акциялари АҚШ санкцияларидан кейин кескин пасайди. Икки кун ичида уларнинг умумий капитализацияси 424 миллиард рублга (5,2 миллиард долларга) камайди.

“Роснефть”нинг қимматли қоғозлари ҳозирда 389,85 рублдан сотилмоқда — бу санкциялардан олдинги қийматидан 3 фоизга арзон. 24-октябрда эса 383,15 рублга тушди — бу 2023 йил майидан буёнги энг паст кўрсаткич. Компаниянинг бозор қиймати 127 миллиард рублга (1,56 миллиард доллар) йўқолди.

“Лукойл” акциялари эса икки кун ичида 7,2 фоизга арзонлашди ва капитализацияси 3,66 миллиард долларга пасайди. Компания асосий эгаси Вагит Алекперовнинг бойлиги ҳам икки кунда 83 миллиард рублга (1 миллиард доллардан ортиқ) камайди.

АҚШ санкциялари

АҚШ президенти Дональд Трамп Оқ уйга қайтгандан бери биринчи марта “Роснефть” ва “Лукойл” ҳамда уларнинг 36 та шўъба корхонасига қарши санкциялар жорий қилди. Бу қарор “Лукойл”нинг Дубайдаги савдо бўлинмасини тўхтатиши ва “Роснефть”нинг Ҳиндистонга етказиб беришларида муаммо келтириб чиқариши мумкин.

Трамп 22-октябр куни эълон қилган санкциялар Россия президенти Владимир Путин билан муносабатлардаги кескинлик фонида қабул қилинди. Кейинчалик Ҳиндистон Россия нефти импортларини қисқартира бошлади.

Маълумотларга кўра, Ҳиндистоннинг йирик давлат компаниялари — Indian Oil Corp, Bharat Petroleum, Hindustan Petroleum ва Mangalore Refinery and Petrochemicals Россия нефти ҳужжатларини янада қаттиқ текширмоқда.

Эслатиб ўтамиз, Россия 2022 йилда Украинага бостириб киргач, Ҳиндистон Москва нефтининг энг йирик харидорига айланганди. 2025 йилнинг дастлабки тўққиз ойида Ҳиндистон ўртача кунига 1,7 миллион баррель Россия нефтини импорт қилган.