Энергетика тизими чекловларга эмас, шаффофликка муҳтож — Отабек Бакиров
Ўзбекистон қиш мавсумининг кескин совуқ кунларига юз тутар экан, энергетика тизими аҳолининг ўсиб бораётган талабларига жавоб беришга мажбур бўлмоқда. Энергетика вазирлигининг баёнотида табиий газ ва электр энергиясига талаб сезиларли даражада ошгани, айниқса, газ босимининг пасайиши натижасида газ қуйиш шохобчаларининг фаолияти чекланаётгани айтилган. Аммо бу чоралар самарадорлиги жамоатчилик орасида муҳокамаларга сабаб бўлмоқда.
Energetika tizimi cheklovlarga emas, shaffoflikka muhtoj — Otabek Bakirov
Энергетика вазирлигининг маълумотларига кўра, қишнинг совуқ кунлари давомида табиий газ истеъмоли бир ҳафтада 20 фоизга, электр қуввати истеъмоли эса 15 фоизга ошган. Вазирлик томонидан электр ва газ узатиш тармоқларидаги ишларга 1600 та махсус бригадалар жалб этилиб, аварияларни бартараф этиш муддати ўртача 1-1,5 соатгача қисқартирилгани маълум қилинди.
Шунингдек, вазирлик аҳолини энергия билан узлуксиз таъминлаш мақсадида автомобилларга газ тўлдириш шохобчалари (АГТШ) фаолиятига чекловлар жорий этишини, аҳолини хабардор қилиш мақсадида Авто24 мобил иловаси ва ишонч телефонларини ишга туширганини, электр ва газ таъминотидаги носозликларни тезкорлик билан ҳал этиш учун техника ва ускуналар билан таъминланган бригадалар ташкил этганини ҳам очиқлади.
Аммо вазирликнинг мазкур баёноти жамоатчилик фаоллари томонидан кескин эътирозга юз тутмоқда. Хусусан, иқтисодчи Отабек Бакиров бу жараёндаги камчиликларни қаттиқ танқид қилган. Бакировнинг ёзишича, газ қуйиш шохобчаларини ёпиш жараёни кўпинча олдиндан огоҳлантиришсиз амалга оширилмоқда.
Жумладан, Тошкент шаҳри, Фарғона водийси вилоятлари ҳудудларида шохобчалар эрталабдан бошлаб ёпилган, аммо бу ҳақда ҳеч қандай расмий ахборот тақдим этилмаган.
"Қайси ҳудудда қайси заправка ёпилишини ким белгилайди? Шонли энергетиклар худди аввалги йиллардаги каби ва ундан ҳам ортиқ цинизм билан заправкалар ёпилишини ўзларидан соқит қилиб, ҳокимликларга юклаб қўя қолган. Бугунги баёнотда хусусан, вилоятлар ва туманлар ҳокимликлари расмий ахборот манбаларида тегишли тартибда маълумот бериб борилиши айтилган.
Бугун эрталабдан Тошкент, Наманган, Фарғона ва Андижон вилоятларида огоҳлантиришсиз ёпилган ўнлаб газ заправкалари бўйича қаерда маълумот берилди? Ёпиладиган заправкалар рўйхатини, ишлайдиган заправкалар рўйхатини очиқ эълон қилиб қўйиш наҳотки шунчалар қийин?", дея ёзган Бакиров Telegram'даги саҳифасига.
