“Нормандияда бир йил” – Девид Хокнининг 70 метрлик асари тақдим этилди

Девид Хокнининг Bayeux Tapestry (Байё каштаси - бу машҳур ўрта аср санъат асари бўлиб, 1066 йилдаги Англияни норманлар босиб олиш воқеаларини тасвирлайди)ва Нормандиядаги фасллар алмашинувидан илҳомланиб яратган 70 метрлик “Нормандияда бир йил” номли эпик санъат асари Лондондаги янги нуфузли кўргазманинг асосий дурдонасига айланди.

2019 йилда Нормандия қишлоғига кўчиб ўтган Британия санъатининг ёрқин намояндаси Девид Хокни ўзини бутунлай қишлоқ ҳаёти оҳангларига бағишлади.

Атрофи мевали боғлар, илонизи йўллар ва ўзгарувчан осмондан иборат муҳитда британиялик рассом бир неча ой давомида фаслларнинг алмашинишини кузатди ва кўпинча табиат қўйнида ижод қилди.

Ўзининг Apple iPad қурилмаси ёрдамида Хокни очиқ ҳавода эскизлар ва расмлар чизиб, уйи атрофидаги ёруғлик, об-ҳаво ҳамда ранглардаги нафис ўзгаришларни акс эттирди.

Бу кундалик кузатувлар охир-оқибат унинг узоқ йиллик фаолиятидаги энг маҳобатли асарларидан бирига айланди.