OpenAI янги ChatGPT Work агентини намойиш қилди

OpenAI 9 июнь куни офис ходимларига дастурлаш воситаларининг имкониятларидан катта харажатларсиз фойдаланишга ёрдам берадиган янги сунъий интеллект агентини намойиш этди. Бу ҳақда Reuters хабар берди.

Компаниянинг маълум қилишича, ChatGPT Work деб номланган ушбу агент ChatGPT ва Codex сунъий интеллект дастурлаш воситасини бирлаштиради. У фойдаланувчиларга ҳужжатлар, тақдимотлар ва веб-сайтлар яратишда ёрдам беради. Хизмат OpenAI’нинг пайшанба куни тақдим қилинган энг илғор сунъий интеллект модели — GPT-5.6 асосида ишлайди.

Ўтган ойда мазкур модел тақдимоти миллий хавфсизлик билан боғлиқ хавотирлар сабабли АҚШ ҳукуматининг илтимосига биноан кечиктирилган эди.

Корпоратив сунъий интеллект бозоридаги рақобат

ChatGPT Work — OpenAI’нинг жорий йил январь ойида Anthropic тақдим этган Claude Cowork агентига жавоби ҳисобланади. Claude Cowork ҳам мураккаб, бир неча босқичдан иборат вазифаларни мустақил режалаштириб, бажаришга қодир.

Бу тақдимот сунъий интеллект воситаларини яратиш ва сотиш борасида рақобат кучайиб бораётганини акс эттиради.

Тез орада биржага чиқишга ҳозирлик кўраётган Anthropic ва OpenAI компаниялари корпоратив мижозлар бозорини эгаллаш учун кескин рақобат олиб бормоқда. Чунки компанияларга хизмат кўрсатиш истеъмолчиларга маҳсулот сотишдан кўра анча даромадли ҳисобланади.

ChatGPT Work ҳам, Claude Cowork ҳам дастурлашни билмайдиган фойдаланувчиларга мўлжалланган. Улар ёрдамида сунъий интеллект асосидаги дастурлаш воситаларидан осон фойдаланиш мумкин.

Ушбу воситалар одатий chatbot’ларга қараганда кўпроқ имкониятларга эга, бироқ улардан фойдаланиш ҳам махсус билим талаб қилади.

OpenAI GPT-5.6 моделини тақдим қилди

OpenAI ўзининг GPT-5.6 моделини уч хил ўлчамда чиқарди.

«Ҳар қандай соҳадаги муаммоларни ҳал қилиш учун моделнинг код ёзиш қобилиятидан фойдаланиш мумкин», — деди ChatGPT Work маҳсулот менежери Тай Гери интервьюсида.

Гери OpenAI’нинг GPT-5.6 моделини «анча арзон бўлишига қарамай, икки баробар тезкор ва ўзидан анча қиммат моделлар билан рақобатлаша олади», деб таърифлади.

Пайшанба кунги тақдимот компаниялар сунъий интеллект воситаларидан фойдаланиш харажатлари юқорилигидан тобора кўпроқ хавотирланаётганини ҳам кўрсатди.

Creative Strategies консалтинг фирмаси таҳлилчиси Макс Вайн Бахнинг айтишича, OpenAI янги моделининг энг кичик версияси топшириқни худди энг катта версияси каби бажара олади, энг аҳамиятлиси эса у беш баравар арзон.

«Кичик моделлар бундай турдаги топшириқларни бажарганини биринчи марта кўришим», — деди у.

ChatGPT Work: янги функциялар

ChatGPT Work 9 июндан бошлаб веб ва мобил иловаларда ишга туширилади. Дастлаб ундан Pro, Enterprise ва Edu тарифидаги фойдаланувчилар фойдаланиши мумкин бўлади. Кейинги бир неча кун ичида хизмат Plus ва Business фойдаланувчилари учун ҳам тақдим этилади.

Шунингдек, OpenAI янги ChatGPT компьютер иловаси ва Hosted Websites функциясини ҳам эълон қилди. Бу функция фойдаланувчиларга ChatGPT Work орқали веб-сайт яратиш ва уни бошқалар билан улашиш имконини беради.