OpenAI yangi ChatGPT Work agentini namoyish qildi

OpenAI 9-iyun kuni ofis xodimlariga dasturlash vositalarining imkoniyatlaridan katta xarajatlarsiz foydalanishga yordam beradigan yangi sun’iy intellekt agentini namoyish etdi. Bu haqda Reuters xabar berdi.

Kompaniyaning ma’lum qilishicha, ChatGPT Work deb nomlangan ushbu agent ChatGPT va Codex sun’iy intellekt dasturlash vositasini birlashtiradi. U foydalanuvchilarga hujjatlar, taqdimotlar va veb-saytlar yaratishda yordam beradi. Xizmat OpenAI’ning payshanba kuni taqdim qilingan eng ilg‘or sun’iy intellekt modeli – GPT-5.6 asosida ishlaydi.

O‘tgan oyda mazkur model taqdimoti milliy xavfsizlik bilan bog‘liq xavotirlar sababli AQSH hukumatining iltimosiga binoan kechiktirilgan edi.

Korporativ sun’iy intellekt bozoridagi raqobat

ChatGPT Work – OpenAI’ning joriy yil yanvar oyida Anthropic taqdim etgan Claude Cowork agentiga javobi hisoblanadi. Claude Cowork ham murakkab, bir necha bosqichdan iborat vazifalarni mustaqil rejalashtirib, bajarishga qodir.

Bu taqdimot sun’iy intellekt vositalarini yaratish va sotish borasida raqobat kuchayib borayotganini aks ettiradi.

Tez orada birjaga chiqishga hozirlik ko‘rayotgan “Anthropic” va “OpenAI” kompaniyalari korporativ mijozlar bozorini egallash uchun keskin raqobat olib bormoqda. Chunki kompaniyalarga xizmat ko‘rsatish iste’molchilarga mahsulot sotishdan ko‘ra ancha daromadli hisoblanadi.

ChatGPT Work ham, Claude Cowork ham dasturlashni bilmaydigan foydalanuvchilarga mo‘ljallangan. Ular yordamida sun’iy intellekt asosidagi dasturlash vositalaridan oson foydalanish mumkin. 

Ushbu vositalar odatiy chatbotlarga qaraganda ko‘proq imkoniyatlarga ega, biroq ulardan foydalanish ham maxsus bilim talab qiladi.

OpenAI GPT-5.6 modelini taqdim qildi

OpenAI o‘zining 5.6 modelini uch xil o‘lchamda chiqardi.

“Har qanday sohadagi muammolarni hal qilish uchun modelning kod yozish qobiliyatidan foydalanish mumkin”, — dedi ChatGPT Work mahsulot menejeri Tay Geri intervyusida.

Geri OpenAI’ning 5.6 modelini “ancha arzon bo‘lishiga qaramay, ikki barobar tezkor va o‘zidan ancha qimmat modellar bilan raqobatlasha oladi” deb ta’rifladi.

Payshanba kungi taqdimot kompaniyalar sun’iy intellekt vositalaridan foydalanish xarajatlari yuqoriligidan tobora ko‘proq xavotir olayotganini ham ko‘rsatdi.

“Creative Strategies” konsalting firmasi tahlilchisi Maks Vayn Baxning aytishicha, OpenAI yangi modelining eng kichik versiyasi topshiriqni xuddi eng katta versiyasi kabi bajara oladi, eng ahamiyatlisi esa u besh baravar arzon.

“Kichik modellar bunday turdagi topshiriqlarni bajarganini birinchi marta ko‘rishim”, — dedi u.

ChatGPT Work: yangi funksiyalar

ChatGPT Work 9-iyundan boshlab veb va mobil ilovalarda ishga tushiriladi. Dastlab undan Pro, Enterprise va Edu tarifidagi foydalanuvchilar foydalanishi mumkin bo‘ladi. Keyingi bir necha kun ichida xizmat Plus va Business foydalanuvchilari uchun ham taqdim etiladi.

Shuningdek, OpenAI yangi ChatGPT kompyuter ilovasi va Hosted Websites funksiyasini ham e’lon qildi. Bu funksiya foydalanuvchilarga ChatGPT Work orqali veb-sayt yaratish va uni boshqalar bilan ulashish imkonini beradi.