Samarkand-2028 гиперспектрал сунъий йўлдоши 5 август куни орбитага учирилади

Бу ҳақда “Ўзбеккосмос” агентлиги маълум қилди.

Samarkand-2028 лойиҳаси “Ўзбеккосмос” агентлиги ва STAR.VISION компанияси ўртасида имзоланган стратегик меморандум доирасида амалга оширилмоқда. Йўлдошга Самарқанд номи 2028 йилги Халқаро астронавтика конгресси (IAC) айнан Самарқанд шаҳрида ўтказилиши муносабати билан берилган.

Лойиҳа доирасида “Ўзбеккосмос” мутахассислари сунъий йўлдош борти учун махсус сунъий интеллект модулини ишлаб чиққан. У гиперспектрал маълумотларни орбитанинг ўзида қайта ишлаш имконини беради ва Ер юзасини масофадан зондлаш самарадорлигини оширади.

Мутахассислар таъкидлашича, йўлдошдан олинадиган маълумотлар қишлоқ хўжалиги, экология, табиий ресурсларни мониторинг қилиш ҳамда бошқа илмий ва амалий йўналишларда қўлланилади.

Ҳозирда ракета старт кемасига жойлаштирилган бўлиб, учириш майдонига йўл олган. Барча тайёргарлик ишлари режа асосида давом этмоқда.