Телефонингиз бош бармоғингизни ишдан чиқаряпти — тадқиқот

Соатлаб ижтимоий тармоқда ўтириш, сериалларни тўлиқ томоша қилиш — смартфонлар кундалик одатимизга айланиб улгурди. Бироқ булар қўлларимизга салбий таъсирини кўрсатмай қолмайди.

“Қўлларимиз кун бўйи телефондан фойдаланиш учун яратилмаган. Телефондан фойдаланишда қўлларимизга эътиборли бўлишимиз керак”, — дейди Sedars-Sinay Ортопедия ва спорт тиббиёти маркази жарроҳи Евгений Сай.

Ҳозирги смартфонлар аввалгиларига қараганда каттароқ ва оғирроқ бўлиб, улардан фойдаланиш одатларимиз ҳам ўзгарган.

Билак ва тирсакларни соатлаб бир хил ҳолатда ушлаб туриш бош бармоқ ва билакда оғриқ пайдо қилади. Телефонни узоқ вақт тик ушлаб туриш бошқа бармоқларни ҳам зўриқтиради.

Қандай тавсиялар бор?

Энг оддий ечим – экран вақтини чеклаш ёки телефондан фойдаланишда ора-орада қисқа танаффуслар қилиб туриш.

Агар сиз учун бу имконсиз бўлса, қўлларингиздан навбатма-навбат фойдаланинг, бош бармоқ ўрнига кўрсаткич бармоқни ҳам ишлатинг. Қурилмани ушлаш ҳолатингизни тез-тез ўзгартиринг.

Смартфондаги махсус имкониятлар ҳам анча самарали. Масалан, шрифт ҳажмини катталаштириш телефонни юзга яқин ушлаб туриш заруратини йўқотади.

Ҳалқа ва доира шаклидаги тутқичлар телефон оғирлигини кафтга бир текис тақсимлаб, видео томоша қилиш учун таянч вазифасини ҳам бажариши мумкин.

Ҳар куни бажариладиган оддий қўл машқлари эса узоқ вақт телефон ишлатгандан кейинги оғриқларни камайтиради.

Телефондан доимий фойдаланиш бош бармоқдаги мавжуд артритни кучайтириши, Де Кервен теносиновитини келтириб чиқариши ёки “trigger thumb” номли синдромга сабаб бўлиши мумкин.