“Диққатини жамлай олмаган компания”: OpenAI стратегияси танқид остида

Ўтган ойда OpenAI кремний соҳаси тарихидаги энг йирик молиялаштириш раунди сифатида қайд этилиши мумкин бўлган келишувда 122 миллиард доллар жалб қилди. 

Бироқ компания сўнгги олти ой ичида рақобатчилар – аввалига Google, кейинроқ эса Anthropic томонидан юзага келган таҳдидларга жавобан ҳаракат режасини икки марта қайта кўриб чиқди.

Ҳисоботга кўра, OpenAIнинг айрим инвесторлари бу ўзгаришлар компанияни Anthropic ва юксалаётган Google олдида заиф қилиб қўйиши мумкинлигини айтган, ваҳоланки компания шу йилда биржага илк бор чиқишга тайёргарлик кўрмоқда.

Соҳанинг айрим кузатувчилари Anthropicнинг даромад ўсиши суръати бир неча ой ичида OpenAIникидан ошиб кетишини тахмин қилмоқда.

"Қўлингизда йилига 50-100 фоиз ўсаётган, 1 миллиард фойдаланувчига эга ChatGPT каби бизнес турганида, корпоратив тизим ва код ҳақида гапириб нима қиласиз?" — деди OpenAI нинг илк инвесторларидан бири "Бу диққатини бир нуқтага жамлай олмаган компания."

OpenAIнинг бош молиявий директори Сара Фриарнинг сўзларига кўра, инвесторлар компания стратегиясини дастакламаяпти деган тахминлар ҳақиқатга зид.

OpenAI вакили Reuters агентлигига электрон почта орқали юборган баёнотида компаниянинг 122 миллиард долларлик маблағ йиғиш кампанияси тез муддатда якунланганини ва етакчи глобал инвесторларнинг кенг доираси томонидан қўллаб-қувватланганини таъкидлади. 

Унинг сўзларига кўра, бу ҳолат компаниянинг йўналиши, ҳозирги бизнес суръати ва узоқ муддатли қийматига бўлган кучли ишончни кўрсатади.