Ўзбекистонда 500 минг сўмлик янги пул чиқариладими? Марказий банк муносабат билдирди

Маълум қилинишича, мазкур хабарлар асоссиз бўлиб, ҳозирги кунда янги пул белгисини муомалага чиқариш масаласи кўриб чиқилаётгани йўқ.

Марказий банк таъкидлашича, Ўзбекистон ҳудудида банкнот ва тангаларни муомалага чиқариш бўйича мутлақ ваколат айнан ушбу органга тегишли. Бу “Ўзбекистон Республикасининг Марказий банки тўғрисида”ги Қонуннинг 40-моддасида белгилаб қўйилган.

Шунингдек, янги пул белгилари фақат Ўзбекистон Республикаси Олий Мажлиси Сенати Кенгаши томонидан тегишли қарор қабул қилинганидан сўнг жорий этилади. Бундан кейин Марказий банк томонидан янги банкнота тавсифи ва уни муомалага чиқариш тартиби оммавий ахборот воситалари орқали расман эълон қилинади.

Расмийлар фуқароларни тасдиқланмаган ахборотларга ишонмасликка ва фақат ишончли манбаларга таянишга чақирди.