Ўзбекистонда биринчи исломий банк қачон очилади?

“Ўзбекистон – 2030” стратегиясининг янгиланган таҳрири жамоатчилик муҳокамасига қўйилди. Ҳужжатда мамлакат молия бозорини тубдан ислоҳ қилишга қаратилган муҳим режалар ва аниқ муддатлар белгилаб берилган.

Стратегия доирасида кўп йиллардан бери муҳокама қилиб келинаётган исломий молия хизматларини жорий этиш бўйича аниқ қадамлар эълон қилинди. Жумладан, 2027 йилда Ўзбекистонда исломий молия хизматларини кўрсатувчи биринчи банк ташкил этилиши режалаштирилган.

Шунингдек, 2029–2030 йилларда яна иккита исломий банк фаолияти йўлга қўйилиши кўзда тутилган. Натижада, 2030 йилга келиб мамлакатда учта банк исломий молия тамойиллари асосида иш юритади.

Бундан ташқари, стратегияда давлатнинг банк сектордаги иштирокини қисқартириш масаласига ҳам алоҳида эътибор қаратилган. Режага кўра, 2027–2030 йиллар давомида ҳар йили биттадан давлат банки хусусийлаштирилади. 2030 йилга келиб эса давлат ихтиёрида фақат тўртта банк қолиши кутилмоқда.

Мазкур ислоҳотлар молия бозорида рақобатни кучайтириш, хусусий секторни қўллаб-қувватлаш ва аҳолининг исломий молия хизматларига бўлган талабини қондиришга хизмат қилади.