Ўзбекистонда Исломий банк фаолияти жорий этилади

Ўзбекистон Олий Мажлиси Сенати исломий банк фаолиятини жорий этишга қаратилган қонунни маъқуллади. Ҳужжат билан исломий банк фаолиятини амалга ошириш ҳуқуқини берувчи алоҳида лицензия тури жорий этилиб, унга қўйиладиган талаблар белгиланмоқда.

Қонунга мувофиқ, мазкур лицензия асосида банклар тўлиқ исломий банк фаолиятини амалга ошириши ёки бир вақтнинг ўзида ҳам анъанавий, ҳам исломий банк хизматларини кўрсатиши мумкин бўлади.

Шунингдек, исломий молия фаолияти билан боғлиқ масалаларни мувофиқлаштириш мақсадида Ўзбекистон Республикаси Марказий банкида ҳамда исломий банк фаолиятини амалга оширувчи банкларда исломий молия кенгашларини ташкил этиш назарда тутилмоқда. Ушбу кенгашларнинг фаолиятига доир аниқ талаблар ҳам белгиланмоқда.

Бундан ташқари, исломий молия операцияларининг ўзига хос хусусиятларини инобатга олган ҳолда Солиқ кодексига алоҳида боб киритилмоқда. Унга кўра, исломий молия фаолиятидан олинган даромадлар солиқ солиш мақсадларида фоизли даромадларга тенглаштирилади. Шу билан бирга, банклар ва микромолия ташкилотлари томонидан мижозларга реализация қилинадиган товарларга қўйиладиган устама қиймат солиғидан (ҚҚС) озод этилади.

Қонуннинг қабул қилиниши мамлакатда исломий молия хизматларини ривожлантириш, молиявий бозорни диверсификация қилиш ҳамда аҳоли ва тадбиркорлар учун янги молиявий имкониятлар яратишга хизмат қилиши кутилмоқда.