Oʻzbekistonda Islomiy bank faoliyati joriy etiladi

Oʻzbekiston Oliy Majlisi Senati islomiy bank faoliyatini joriy etishga qaratilgan qonunni maʼqulladi. Hujjat bilan islomiy bank faoliyatini amalga oshirish huquqini beruvchi alohida litsenziya turi joriy etilib, unga qoʻyiladigan talablar belgilanmoqda.

Qonunga muvofiq, mazkur litsenziya asosida banklar toʻliq islomiy bank faoliyatini amalga oshirishi yoki bir vaqtning oʻzida ham anʼanaviy, ham islomiy bank xizmatlarini koʻrsatishi mumkin boʻladi.

Shuningdek, islomiy moliya faoliyati bilan bogʻliq masalalarni muvofiqlashtirish maqsadida Oʻzbekiston Respublikasi Markaziy bankida hamda islomiy bank faoliyatini amalga oshiruvchi banklarda islomiy moliya kengashlarini tashkil etish nazarda tutilmoqda. Ushbu kengashlarning faoliyatiga doir aniq talablar ham belgilanmoqda.

Bundan tashqari, islomiy moliya operatsiyalarining oʻziga xos xususiyatlarini inobatga olgan holda Soliq kodeksiga alohida bob kiritilmoqda. Unga koʻra, islomiy moliya faoliyatidan olingan daromadlar soliq solish maqsadlarida foizli daromadlarga tenglashtiriladi. Shu bilan birga, banklar va mikromoliya tashkilotlari tomonidan mijozlarga realizatsiya qilinadigan tovarlarga qoʻyiladigan ustama qiymat soligʻidan (QQS) ozod etiladi.

Qonunning qabul qilinishi mamlakatda islomiy moliya xizmatlarini rivojlantirish, moliyaviy bozorni diversifikatsiya qilish hamda aholi va tadbirkorlar uchun yangi moliyaviy imkoniyatlar yaratishga xizmat qilishi kutilmoqda.