Ўзбекистон аҳолисининг даромадлари ошгани эълон қилинди

Статистика қўмитаси тақдим қилган 7 ойлик ҳисоботга кўра, истеъмол нархларининг ўзгариши сабабли ўтган йилнинг мос даврига нисбатан аҳоли умумий даромадларининг реал ўсиш суръати 109,5 % ни ташкил этган.

Ўтган йилнинг мос даврида мазкур кўрсаткич 111,9 %  ни ташкил этган. Ўсиш суръатининг секинлашишига валюта курсининг мўтадиллашиши ҳамда шахсий истеъмол учун ўзида ишлаб чиқарилган хизматлардан олинган даромадлар, яъни “МҲТ – 2008” халқаро стандарти асосида ўз уйида яшаш бўйича хизматлар (шартли уй-жой рентаси)ни баҳолаш бўйича республика бўйлаб ижара тўловлари ўсиш суръатлари паст бўлганлиги туфайли қўшилган қийматнинг асосий компоненти бўлган, операцион фойда кўрсаткичининг ўсиш суръатлари секинлашиши каби омиллар таъсир кўрсатган.

Шунингдек, январь-июнь ҳолатига кўра, аҳоли жон бошига умумий даромадлар 13,7 млн сўмни, аҳоли жон бошига умумий даромадларнинг номинал ўсиш суръати 117,7 % ни ва реал ўсиш суръати 107,4 % ни ташкил этган.

Мазкур ойларда аҳоли жон бошига ўртача умумий даромадлар бўйича Тошкент шаҳри (35 079,6 минг сўм), Навоий (20 048,7 минг сўм), Бухоро (15 883,9 минг сўм) ва Тошкент (13 740,5 минг сўм) вилоятларида ўртача республика даражасидан юқори кўрсаткичлар қайд этилган.

Қорақалпоғистон Республикаси (9 198,0 минг сўм), Наманган (9 457,0 минг сўм), Жиззах (10 220,2 минг сўм), Сурхондарё (10 396,4 минг сўм), Сирдарё (10 451,8 минг сўм), Қашқадарё (10 563,3 минг сўм), Самарқанд (11 131,3 минг сўм), Фарғона (11 427,2 минг сўм), Андижон (11 983,1 минг сўм) ва Хоразм (13 454,6 минг сўм) вилоятларида аҳоли жон бошига умумий даромадлар ўртача республика даражасидан паст кўрсаткичлар қайд этилган.

Аҳоли жон бошига умумий даромадларнинг энг юқори реал ўсиши юқори даражаси Фарғона вилояти (15,5 %) ҳамда Тошкент шаҳрида (12,8 %) кузатилган. Қолган вилоятлар ва Қорақалпоғистон Республикасида аҳоли жон бошига умумий даромадларнинг ўсиши паст кўрсаткични ташкил қилган.

Ҳисоботда ёзилишича, мазкур ойларда аҳоли умумий даромадларнинг катта қисми юридик ташкилотларда ишловчи ёлланма ишчиларнинг даромадлари аҳоли умумий даромадларнинг 60,6 %ини ташкил қилади.

Шунингдек, аҳоли умумий даромадлари таркибида шахсий истеъмол учун ўзида ишлаб чиқарилган хизматлардан олинган даромадларнинг улуши 6,6 %, мол-мулкдан олинган даромадларнинг улуши 3,4 %, трансфертлардан олинган даромадлар улуши 29,4 % ни ташкил қилди.

Трансфертлардан олинган даромадларнинг улуши Фарғона, Андижон, Самарқанд, Хоразм, Сурхондарё, Қашқадарё, Наманган вилоятларида ҳамда Қорақалпоғистон Республикаси ва Бухоро вилоятида аҳоли умумий даромадларига нисбатан 30 % дан юқори кўрсаткични ташкил этган бўлса, Навоий вилоятида мазкур даромад турининг улуши энг паст яъни, 13,9 % ни ташкил этди.