Қирғизистон илк бор миллий валютасини мустақил чоп этишни бошлади

Бу ҳақда мамлакат президенти Садир Жапаров маълум қилди.

Аввалроқ Қирғизистон миллий валютани чоп этиш учун хорижий компанияларга мурожаат қилиб келган. Хусусан, сом De La Rue (Буюк Британия) ва Oberthur Fiduciaire (Франция) корхоналарида тайёрланган.

Президент таъкидлашича, аввал валютани хорижда чоп эттириш учун маблағ тўланган. Энди мамлакат ўзининг миллий валютасини мустақил равишда ишлаб чиқариш имкониятига эга. Шунингдек, келгусида бошқа давлатлар учун ҳам валюта чоп этиш режалаштирилмоқда.

Қирғизистон пул ишлаб чиқариш соҳасида халқаро стандартларга мосликни тасдиқловчи сертификатларни ҳам қўлга киритган. Мамлакатда аллақачон ID-карталар, ҳайдовчилик гувоҳномалари ва бошқа ҳужжатлар ҳам чоп этилмоқда.

Маълумот учун, Ўзбекистонда миллий валюта ишлаб чиқариш босқичма-босқич шаклланган. Илк йилларда сўм-купонлар хорижда, жумладан Британиянинг «Harrison & Sons» компаниясида чоп этилган.

1994 йилда жорий этилган миллий валюта — сўмнинг дастлабки банкнотлари Германиянинг Giesecke & Devrient корхонасида тайёрланган. Танга пуллар эса Россияда зарб этилган.

Кейинчалик Тошкентдаги «Давлат белгиси» корхонаси ишга туширилиб, 1997 йилдан бошлаб банкноталар тўлиқ мамлакат ичида чоп этила бошланди. Ҳозирда бу корхонада бошқа давлатлар валюталари ҳам тайёрланади.