Европа яна Россия газига қайтадими?

Бу баёнот Европа Иттифоқи Россия нефти ва газидан воз кечишга уринаётган бир пайтда янгради.

«Россия гази барибир арзонроқ»

Петер Мадьярнинг таъкидлашича, уруш тугагач Европа давлатлари иқтисодий манфаатлар сабаб яна Россия газига мурожаат қилиши мумкин.

Унинг фикрича, бу масала сиёсатдан кўра кўпроқ иқтисодий рақобат ва энергия нархлари билан боғлиқ.

Венгрия бош вазири Польша ва Болтиқ денгизи орқали келаётган суюлтирилган LNG гази нархи Румыния, Россия ёки Австриядан келадиган газга қараганда анча қиммат эканини айтган.

Шу билан бирга, у Польша бош вазири Дональд Туск LNG гази нархини тушириш учун ҳаракат қилаётганини ҳам қайд этган.

Венгрия бир нечта газ манбаларига таянишни истамоқда

Мадьярнинг айтишича, бир нечта манбадан газ олиш Венгрия учун энергия хавфсизлигини оширади ва нархлар бўйича яхшироқ музокара қилиш имконини беради.

Шу сабаб мамлакат янги газ тармоқлари ва энергетик уланиш лойиҳаларини ривожлантиришни режалаштирмоқда.

Сиёсий ўзгариш ва энергия муаммоси

Хабарларга кўра, Виктор Орбан сайловдаги мағлубиятдан кейин Венгрия катта сиёсий ўзгаришлар босқичига кирган.

Айни пайтда мамлакат энергия барқарорлиги билан боғлиқ муаммоларга ҳам дуч келмоқда. Нефть захираларининг камайиши ҳукумат олдига мураккаб вазифаларни қўймоқда.

Петер Мадьяр ҳукумати ёқилғи инқирозининг олдини олиш ва энергия тизимини барқарорлаштиришга уринмоқда.

Мутахассислар фикрича, бу режалар амалга ошмаса, нафақат Венгрия, балки Украина учун ҳам жиддий оқибатлар юзага келиши мумкин.

Европа Россия энергиясидан тўлиқ воз кечадими?

Петер Мадьяр Европа Иттифоқининг кейинги уч йил ичида Россия нефти ва газидан бутунлай воз кечиш режаси уруш тугагач ўзгариши мумкинлигини ҳам билдирган.

Унинг фикрича, Европа давлатлари рақобатбардош бўлиб қолиши учун энергия нархларини пасайтиришга мажбур бўлади.

Шу билан бирга, 2025 йилда Болгариядаги Демократияни ўрганиш маркази ва Финляндиядаги CREA маркази Венгрия ҳамда Словакия Россия нефти ва газидан воз кечиш имкониятига эга бўлса-да, буни атайлаб кечиктираётганини билдирган.

Уларнинг фикрича, бу ҳолат Европа Иттифоқининг энергетик хавфсизлик стратегияси ва Россияга қарши санкциялар сиёсатига зид ҳисобланади.

Аввалроқ венгриялик энергетика эксперти Ричард Демени ҳам ҳозирча Венгрия “Дружба” қувуридан фойдаланишда давом этишини, Европа Иттифоқи ва Украина эса янги ҳукуматга вақт бериш учун бу жараёнга тўсқинлик қилаётмаганини айтган.