Украинага Европа Иттифоқига қўшилиш учун эшик очилмоқда

Чоршанба куни Европа Иттифоқи Украина ва Молдованинг аъзоликка кириш йўлидаги навбатдаги қадамни ташлашига рухсат берди. Дипломатларнинг таъкидлашича, Венгрия Киевга қарши узоқ йиллик ветосидан воз кечаётганига ишора бермоқда.

Европа Иттифоқи Украина билан аъзоликка кириш бўйича музокараларни 2024 йил июнь ойида расман бошлаган эди. Йиллар давом этадиган ушбу мураккаб жараён қишлоқ хўжалигидан тортиб қонун устуворлигигача бўлган барча масалаларни қамраб олади.

Бироқ бу рамзий босқичлигича қолиб, жараённинг амалда бошланишини Венгриянинг собиқ бош вазири Виктор Орбан орқага сураётганди.

Жорий йилнинг апрелида Орбан лавозимидан четлатилгач, Венгриянинг янги бош вазири Петер Мадьяр Будапештнинг Киев билан ҳал этилмаган масалалари ечимини топса, мамнуният билан Украинанинг аъзоликка кириш ҳаракатларини ёқлашини билдирди.

Чоршанба куни Мадьяр Украина билан венгер этник озчилигининг ҳуқуқлари бўйича “тарихий келишув”га эришилганини эълон қилиши – муҳим ўзгаришлардан далолат. Чунки бу масала узоқ вақтдан бери қўшнилар ўртасидаги муносабатларни таранглаштираётган эди.

Венгрия Ташқи ишлар вазири Петер Сияртонинг маълум қилишича, Будапешт Украина миллий озчиликлар бўйича ҳаракатлар режасига тузатиш киритишини истайди. Шундан сўнг “Украинанинг Европа Иттифоқига аъзолиги бўйича музокараларнинг биринчи кластерини очишга рози бўлади”.

Сияртонинг баёнотини олқишлаган Европа Иттифоқининг кенгайиш масалалари бўйича комиссари Марта Кос фикрича, бу Украинанинг Европа Иттифоқига аъзолик йўлида олға силжишига имкон яратади.

2022 йилдаги Россия босқинидан бир неча кун ўтиб бошланган Украинанинг Европа Иттифоқига аъзо бўлиш ҳаракати Венгрия қаршилиги сабаб тўхтаб қолганди.

Аммо Мадьяр ҳам Украинанинг Европа Иттифоқига тезлаштирилган тартибда қўшилишига қаршилигини таъкидлади.

Шунингдек, у агар Украина келгуси 10-15 йил ичида аъзоликка оид барча 33 та бандни ёпишга муваффақ бўлса, мамлакат унинг аъзолиги юзасидан референдум ўтказишини айтди.