26 апрель куни Эрон Ташқи ишлар вазири Аббос Ароқчи ва Уммон Султонлиги ўртасида ўта муҳим ва шошилинч дипломатик музокаралар бўлиб ўтди.
Ушбу учрашув минтақадаги кескин ҳарбий вазиятни юмшатишга қаратилган.
Аббос Ароқчи Маскатда Уммон Султони Ҳайсам бин Тариқ Ал Саид томонидан қабул қилинди. Учрашувда минтақавий хавфсизлик ва Эрон ҳамда АҚШ-Исроил ўртасидаги урушни тўхтатиш масалалари муҳокама қилинган.
Ароқчи Яқин Шарқдаги АҚШ ҳарбий иштироки можароларга сабаб бўлаётганини таъкидлаб, минтақа давлатларини Вашингтон иштирокисиз коллектив хавфсизлик тизимини яратишга чақирди.
Султон Ҳайсам эса Уммоннинг минтақавий тинчликка содиқлигини таъкидлади ва ҳарбий ҳаракатларни тезроқ тўхтатиш учун мулоқот зарурлигини билдирди.
Уммон узоқ вақтдан бери Теҳрон ва Вашингтон ўртасида асосий воситачи бўлиб келмоқда.
Аббос Ароқчи Х ижтимоий тармоғидаги саҳифасида Уммондаги меҳмондўстликдан миннатдор эканлигини билдириб, қўшнилар Эрон учун устувор аҳамиятга эга эканлигини таъкидлади.
“Икки томонлама муносабатлар ва минтақавий ўзгаришлар юзасидан муҳим музокаралар ўтказдик. Ҳормуз бўғози соҳилидаги давлатлар сифатида барча азиз қўшниларимиз ва бутун дунё манфаатларига хизмат қиладиган хавфсиз транзитни таъминлаш йўлларини ҳам кўриб чиқдик”, - деди Эрон ташқи ишлар вазири.
Эроннинг Уммонга берган зарбалари
Эрон 2026 йил март-апрель ойларида Яқин Шарқдаги 7 та давлатга жами 6 400 дан ортиқ ракета ва дрон учирган. Аксарияти Уммон ҳудудидаги стратегик объектларга, хусусан, порт инфратузилмалари, нефть омборлари, логистика ва ҳарбий иншоотларга йўналтирилган.
Умумий ҳисобда, бу зарбалар натижасида Уммон ҳудудида 7 киши ҳалок бўлган, 16 киши жароҳатланган.
