26-aprel kuni Eron Tashqi ishlar vaziri Abbos Aroqchi va Ummon Sultonligi o‘rtasida o‘ta muhim va shoshilinch diplomatik muzokaralar bo‘lib o‘tdi.
Ushbu uchrashuv mintaqadagi keskin harbiy vaziyatni yumshatishga qaratilgan.
Abbos Aroqchi Maskatda Ummon Sultoni Haysam bin Tariq Al Said tomonidan qabul qilindi. Uchrashuvda mintaqaviy xavfsizlik va Eron hamda AQSH-Isroil o‘rtasidagi urushni to‘xtatish masalalari muhokama qilingan.
Aroqchi Yaqin Sharqdagi AQSH harbiy ishtiroki mojarolarga sabab bo‘layotganini ta’kidlab, mintaqa davlatlarini Vashington ishtirokisiz kollektiv xavfsizlik tizimini yaratishga chaqirdi.
Sulton Haysam esa Ummonning mintaqaviy tinchlikka sodiqligini ta’kidladi va harbiy harakatlarni tezroq to‘xtatish uchun muloqot zarurligini bildirdi.
Ummon uzoq vaqtdan beri Tehron va Vashington o‘rtasida asosiy vositachi bo‘lib kelmoqda.
Abbos Aroqchi X ijtimoiy tarmog‘idagi sahifasida Ummondagi mehmondo‘stlikdan minnatdor ekanligini bildirib, qo‘shnilar Eron uchun ustuvor ahamiyatga ega ekanligini ta’kidladi.
“Ikki tomonlama munosabatlar va mintaqaviy o‘zgarishlar yuzasidan muhim muzokaralar o‘tkazdik. Hormuz bo‘g‘ozi sohilidagi davlatlar sifatida barcha aziz qo‘shnilarimiz va butun dunyo manfaatlariga xizmat qiladigan xavfsiz tranzitni ta’minlash yo‘llarini ham ko‘rib chiqdik”, - dedi Eron tashqi ishlar vaziri.
Eronning Ummonga bergan zarbalari
Eron 2026-yil mart-aprel oylarida Yaqin Sharqdagi 7 ta davlatga jami 6 400 dan ortiq raketa va dron uchirgan. Aksariyati Ummon hududidagi strategik obyektlarga, xususan, port infratuzilmalari, neft omborlari, logistika va harbiy inshootlarga yo‘naltirilgan.
Umumiy hisobda, bu zarbalar natijasida Ummon hududida 7 kishi halok bo‘lgan, 16 kishi jarohatlangan.
