Бишкекда ШҲТнинг 25 йиллигига бағишланган йирик тадбирлар бошланди

ШҲТ Котибияти ва Хитойнинг «Синьхуа» ахборот агентлиги ҳамкорлигида ташкил этилган «Салоҳиятни бирлаштириш: тараққиёт йўлида фаровонлик сари» номли фотокўргазмада ташкилотнинг 25 йиллик фаолиятини акс эттирувчи 32 та фотосурат намойиш этилмоқда.

Экспозиция беш бўлимдан иборат бўлиб, унда ШҲТнинг шаклланиш тарихи, хавфсизлик ва тинчликни мустаҳкамлаш, мамлакатлар ўртасидаги ҳамкорлик, иқтисодий тараққиёт ҳамда халқлар ўртасидаги яқинлашувга бағишланган фотосуратлар ўрин олган.

ШҲТ Котибияти катта мутахассиси Қодирбек Сарбаевнинг таъкидлашича, кўргазма ташкилотнинг 25 йиллик тараққиёт йўлини ва унинг йирик минтақавий тузилмага айланганини намоён этади. БелТА ахборот агентлиги бош директори Андрей Мохор эса фотосуратлар ШҲТнинг босқичма-босқич ривожланишини ёрқин акс эттиришини қайд этди.

 Қирғизистонлик эксперт Исмоил Даиров ташкилотнинг сўнгги йиллардаги жадал ривожланишини юқори баҳолади.

Шунингдек, Бишкекда «Янги даврда "Шанхай руҳи"нинг аҳамияти: қадриятлар бўйича консенсусдан ҳамкорлик амалиётига» мавзусидаги ШҲТ оммавий ахборот воситалари ва аналитик марказлари саммити ҳам бошланди.

26–30 июль кунлари ўтказилаётган саммитда ШҲТга аъзо давлатларнинг етакчи оммавий ахборот воситалари, аналитик марказлари ва давлат идораларидан тахминан 260 нафар вакил ҳамда 150 га яқин ташкилот иштирок этмоқда.

Қирғизистон Президенти маъмуриятининг Ахборот сиёсати хизмати раҳбари Дайирбек Орунбеков оммавий ахборот воситалари ва аналитик марказларнинг жамоатчилик фикрини шакллантириш ҳамда давлатлараро ишончни мустаҳкамлашдаги ўрнини алоҳида таъкидлади.

«Синьхуа» ахборот агентлиги бош директори ўринбосари Си Яньчунь эса медиа ва таҳлил марказлари ШҲТ доирасида давлатлар ўртасидаги мулоқот учун муҳим кўприк вазифасини бажариши кераклигини қайд этди.

Ўзбекистон Фанлар академияси Энг янги тарих маркази бўлим мудири Мирзоҳид Раҳимов ШҲТ Буюк ипак йўли цивилизациялараро ҳамкорлик меросига таяниб, аналитик марказлар ўртасидаги алоқаларни янада кенгайтириш орқали минтақа барқарорлиги ва тараққиётига хизмат қилиши лозимлигини билдирди.