БМТнинг инсон ҳуқуқлари бўйича Олий комиссари: «Ғазо қабристонга айланди»

Женевада БМТ Инсон ҳуқуқлари кенгашининг 60-сессиясида сўзга чиққан Турк, Халқаро суд қарорига кўра, Исроил геноцидни олдини олиш, унга чорловчиларни жазолаш ва Ғазодаги фаластинликларга етарли ёрдам кўрсатиш мажбурияти борлигини таъкидлади.

Унинг сўзларига кўра, тинч аҳолининг оммавий ҳалокати, озиқ-овқат етишмовчилиги, журналистлар ўлдирилиши ва узлуксиз ҳарбий жиноятлар бутун жаҳон жамоатчилигини титратмоқда. «Мен Исроил расмийлари томонидан геноцид риторикасидан очиқча фойдаланилиши ва фаластинликларни таҳқирли дегуманизация қилишидан қаттиқ ҳайратдаман», — деди у.

Турк халқаро ҳамжамият ўз бурчини бажармаётганини танқид қилиб, Ғазода қон тўкилишига барҳам бериш учун шошилинч чоралар кўриш зарурлигини қайд этди. У давлатларни Исроилга қурол етказиб беришни тўхтатишга, ўт очишни тўхтатиш, асирлар ва ноқонуний ушланганларни озод қилиш ҳамда инсонпарварлик ёрдамини таъминлашга чақирар экан, фаластинликларнинг ўз тақдирини ўзи белгилаш ҳуқуқини қўллаб-қувватлаш муҳимлигини таъкидлади.