BMTning inson huquqlari boʻyicha Oliy komissari: «Gʻazo qabristonga aylandi»

Jenevada BMT Inson huquqlari kengashining 60-sessiyasida soʻzga chiqqan Turk, Xalqaro sud qaroriga koʻra, Isroil genotsidni oldini olish, unga chorlovchilarni jazolash va Gʻazodagi falastinliklarga yetarli yordam koʻrsatish majburiyati borligini taʼkidladi.

Uning soʻzlariga koʻra, tinch aholining ommaviy halokati, oziq-ovqat yetishmovchiligi, jurnalistlar oʻldirilishi va uzluksiz harbiy jinoyatlar butun jahon jamoatchiligini titratmoqda. «Men Isroil rasmiylari tomonidan genotsid ritorikasidan ochiqcha foydalanilishi va falastinliklarni tahqirli degumanizatsiya qilishidan qattiq hayratdaman», — dedi u.

Turk xalqaro hamjamiyat oʻz burchini bajarmayotganini tanqid qilib, Gʻazoda qon toʻkilishiga barham berish uchun shoshilinch choralar koʻrish zarurligini qayd etdi. U davlatlarni Isroilga qurol yetkazib berishni toʻxtatishga, oʻt ochishni toʻxtatish, asirlar va noqonuniy ushlanganlarni ozod qilish hamda insonparvarlik yordamini taʼminlashga chaqirar ekan, falastinliklarning oʻz taqdirini oʻzi belgilash huquqini qoʻllab-quvvatlash muhimligini taʼkidladi.