Эпштейнга оид ҳужжатлар интернетдан олиб ташланди

Бу ҳақда New York Post нашри хабар берди.

Нашрнинг суд ҳужжатларига таяниб маълум қилишича, мазкур қарор жабрланувчиларнинг шахсий маълумотлари ошкор бўлиб кетгани сабаб қабул қилинган. Эпштейн иши бўйича жабрланганларнинг манфаатларини ҳимоя қилувчи адвокатлар Нью-Йоркдаги икки судьяни ҳужжатлар эълон қилиниши оғир ва ҳалокатли оқибатларга олиб келиши мумкинлиги ҳақида огоҳлантирган.

Қайд этилишича, 30 январь куни эълон қилинган 3 миллиондан ортиқ файлда фотосуратлар, электрон почта манзиллари, исм-шарифлар ҳамда шахсий банк маълумотлари етарлича тозаланмаган ҳолда очиқ қолган.

Нью-Йорк жанубий округи прокурори Жей Клейтон Эпштейн ва Жислейн Максвелл иштирокидаги одам савдосига оид ишларни назорат қилувчи судьялар Ричард Берман ва Пол Энгелмайерга йўллаган мактубида, Адлия вазирлиги жабрланувчилар ёки уларнинг вакиллари томонидан кўрсатилган барча материаллар интернетдан олиб ташланганини маълум қилди.

Шунингдек, вазирлик ўз ташаббуси билан ҳам “ўчирилиши лозим бўлган” ҳужжатларнинг катта қисмини аниқлаган. Адлия департаменти таҳрир жараёнидаги кўплаб хатоларни “техник ёки инсон омиллари” билан изоҳлаб, махфий ҳужжатлар билан ишлаш протоколлари қайта кўриб чиқилишини билдирди.