Epshteynga oid hujjatlar internetdan olib tashlandi

Bu haqda New York Post nashri xabar berdi.

Nashrning sud hujjatlariga tayanib maʼlum qilishicha, mazkur qaror jabrlanuvchilarning shaxsiy maʼlumotlari oshkor boʻlib ketgani sabab qabul qilingan. Epshteyn ishi boʻyicha jabrlanganlarning manfaatlarini himoya qiluvchi advokatlar Nyu-Yorkdagi ikki sudyani hujjatlar eʼlon qilinishi ogʻir va halokatli oqibatlarga olib kelishi mumkinligi haqida ogohlantirgan.

Qayd etilishicha, 30 yanvar kuni eʼlon qilingan 3 milliondan ortiq faylda fotosuratlar, elektron pochta manzillari, ism-shariflar hamda shaxsiy bank maʼlumotlari yetarlicha tozalanmagan holda ochiq qolgan.

Nyu-York janubiy okrugi prokurori Jey Kleyton Epshteyn va Jisleyn Maksvell ishtirokidagi odam savdosiga oid ishlarni nazorat qiluvchi sudyalar Richard Berman va Pol Engelmayerga yoʻllagan maktubida, Adliya vazirligi jabrlanuvchilar yoki ularning vakillari tomonidan koʻrsatilgan barcha materiallar internetdan olib tashlanganini maʼlum qildi.

Shuningdek, vazirlik oʻz tashabbusi bilan ham “oʻchirilishi lozim boʻlgan” hujjatlarning katta qismini aniqlagan. Adliya departamenti tahrir jarayonidagi koʻplab xatolarni “texnik yoki inson omillari” bilan izohlab, maxfiy hujjatlar bilan ishlash protokollari qayta koʻrib chiqilishini bildirdi.