Эрдўған: Муаммони ҳал қилиш йўли — мустақил Фаластин давлатини тузишдир

Бу ҳақда Эрдўған Мисрга амалга оширган ташрифи якунида, журналистлар саволларига жавоб бериш жараёнида айтди. Давлат раҳбари Шарм аш-Шайх шаҳрида бўлиб ўтган “Тинчлик саммити”да иштирок этди. Саммит Ғазо секторидаги урушни тўхтатиш ва тинчлик келишувини таъминлашга бағишланган эди.

Эрдўғаннинг сўзларига кўра, Ғазони тиклаш ва аҳолини уй-жой билан таъминлаш масаласи жуда муҳим. Туркия лидери Анқара қиш мавсумигача фуқаролар эҳтиёжини қондириш учун фаол ҳаракат олиб боришини билдирди.

Шунингдек, Туркия, АҚШ, Миср ва Қатар раҳбарлари имзолаган “Шарм аш-Шайх тинчлик декларацияси” тарихий аҳамият касб этиши таъкидланди. Эрдўғаннинг таъкидлашича, АҚШ бутун жараён давомида Исроилга таъсир ўтказиши керак.

Президентнинг маълум қилишича, сўнгги кунларда Ғазога 350 дан ортиқ юк машинаси орқали гуманитар ёрдам етказилган. Келишувга кўра, ҳар куни камида 600 та юк автомобили кириши кўзда тутилган.

Туркия раҳбари Форс кўрфази мамлакатлари, АҚШ ва Европани Ғазони қайта тиклашга фаол жалб этиш зарурлигини қайд этди. Шунингдек, Туркия тинчлик жараёнида фаол иштирок этишини ва “Ғазога бўлган қўллаб-қувватловни кучайтириб, геноцид унутилиб кетмаслигини таъминлашини” билдирди.

Эрдўған, шунингдек, АҚШ президенти Доналд Трамп билан дипломатик мулоқотни давом эттириш ниятида эканлигини айтди.

Сурия масаласига тўхталар экан, у Сурия демократик кучларининг (СДС) мамлакат давлат тузилмаларига интеграцияси тезлашса, мамлакат барқарорлигига хизмат қилишини таъкидлади.