Erdoʻgʻan: Muammoni hal qilish yoʻli — mustaqil Falastin davlatini tuzishdir

Bu haqda Erdoʻgʻan Misrga amalga oshirgan tashrifi yakunida, jurnalistlar savollariga javob berish jarayonida aytdi. Davlat rahbari Sharm ash-Shayx shahrida boʻlib oʻtgan “Tinchlik sammiti”da ishtirok etdi. Sammit Gʻazo sektoridagi urushni toʻxtatish va tinchlik kelishuvini taʼminlashga bagʻishlangan edi.

Erdoʻgʻanning soʻzlariga koʻra, Gʻazoni tiklash va aholini uy-joy bilan taʼminlash masalasi juda muhim. Turkiya lideri Anqara qish mavsumigacha fuqarolar ehtiyojini qondirish uchun faol harakat olib borishini bildirdi.

Shuningdek, Turkiya, AQSh, Misr va Qatar rahbarlari imzolagan “Sharm ash-Shayx tinchlik deklaratsiyasi” tarixiy ahamiyat kasb etishi taʼkidlandi. Erdoʻgʻanning taʼkidlashicha, AQSh butun jarayon davomida Isroilga taʼsir oʻtkazishi kerak.

Prezidentning maʼlum qilishicha, soʻnggi kunlarda Gʻazoga 350 dan ortiq yuk mashinasi orqali gumanitar yordam yetkazilgan. Kelishuvga koʻra, har kuni kamida 600 ta yuk avtomobili kirishi koʻzda tutilgan.

Turkiya rahbari Fors koʻrfazi mamlakatlari, AQSh va Yevropani Gʻazoni qayta tiklashga faol jalb etish zarurligini qayd etdi. Shuningdek, Turkiya tinchlik jarayonida faol ishtirok etishini va “Gʻazoga boʻlgan qoʻllab-quvvatlovni kuchaytirib, genotsid unutilib ketmasligini taʼminlashini” bildirdi.

Erdoʻgʻan, shuningdek, AQSh prezidenti Donald Tramp bilan diplomatik muloqotni davom ettirish niyatida ekanligini aytdi.

Suriya masalasiga toʻxtalar ekan, u Suriya demokratik kuchlarining (SDS) mamlakat davlat tuzilmalariga integratsiyasi tezlashsa, mamlakat barqarorligiga xizmat qilishini taʼkidladi.