Эрон Исроил фойдасига жосусликда айбланган шахсни қатл этди

Бу ҳақда Fars News Agency хабар берди.

Тергов маълумотларига кўра, Кейвани Исроил ҳарбийлари ҳамда Моссад разведка хизмати билан ҳамкорлик қилган. У Эрон ҳудудидаги стратегик аҳамиятга эга ҳарбий ва хавфсизлик объектларини кузатиш, видеога олиш ва фотосуратларни Исроил томонига етказишда айбланган.

Маълум қилинишича, айбланувчи дастлаб интернет орқали алоқа ўрнатган, кейинчалик бу ҳамкорлик Европа давлатларида шахсий учрашувлар шаклида давом этган.

Ҳибсга олиниши ва жазо ижроси

Теҳрон расмийларига кўра, Курош Кейвани ўтган йилги “12 кунлик уруш” даврида қўлга олинган. Ҳибс вақтида ундан махсус алоқа воситалари, транспорт ва нақд пул маблағлари мусодара қилинган.

Эрон суд тизими маълумотига кўра, ўлим жазоси Олий суд томонидан тасдиқланиб, барча ҳуқуқий жараёнлар якунланганидан сўнг бугун эрталаб ижро этилган.

Мазкур ҳолат Эроннинг хавфсизлик таҳдидларига нисбатан қатъий позициясини кўрсатади. Бу, шунингдек, мамлакат ичида ва ташқарисида Исроил билан ҳар қандай алоқалар оғир оқибатларга олиб келиши мумкинлиги ҳақида огоҳлантишдир.

Муаллиф: Азиз СОЛИЕВ