Филиппинда 7,8 магнитудали зилзила: қурбонлар бор

Филиппин Фуқаролик мудофааси идораси маълумотига кўра, ҳалок бўлганларнинг 12 нафари Жанубий Котабато, Котабато, Султон Кударат, Сарангани вилоятлари ва Генерал Сантос шаҳрини ўз ичига олган Soccsksargen ҳудудида қайд этилган.

Цунами хавфи эълон қилинди

Зилзиладан сўнг Тинч океани Цунами огоҳлантириш маркази Филиппин соҳилларининг айрим ҳудудларида баландлиги 3 метргача етадиган тўлқинлар кузатилиши мумкинлигини маълум қилди. Шунингдек, Индонезия ва Малайзиянинг айрим қирғоқлари учун ҳам цунами хавфи ҳақида огоҳлантириш берилди.

Кейинроқ Индонезияда эълон қилинган цунами хавфи бекор қилинди.

Бинолар вайрон бўлди

Зилзила силкинишлари ўнлаб вилоятларда, шунингдек, Индонезиянинг Сулавеси оролидаги Манадо шаҳригача сезилди.

Генерал Сантос шаҳрида тез тайёрланадиган таомлар ресторани жойлашган бино қулаган. Ижтимоий тармоқларда тарқалган видеоларда бинодан чанг кўтарилиб, одамлар хавфсиз ҳудудларга қочаётгани акс этган.

Шунингдек, шаҳардаги шифохоналардан бири юқори қаватларда пайдо бўлган ёриқлар сабаб эвакуация қилинди. Notre Dame of Dadiangas университети биноларидан бири ҳам қулаб тушган, аммо ҳодиса вақтида унинг ичида одам бўлмаган.

Президент тезкор чоралар кўришни буюрди

Филиппин президенти Фердинанд Маркос кичик мамлакат ҳукумати барча кучларни сафарбар этганини билдириб, Минданао аҳолиси ёлғиз қолдирилмаслигини таъкидлади.

Айни пайтда ҳудудларда қутқарувчилар вайроналар остида қолганларни қидириш ва зарар кўламини баҳолаш ишларини давом эттирмоқда.

Зилзилалар тез-тез кузатилади

Филиппин ва Индонезия Тинч океанининг «Олов ҳалқаси» деб аталувчи юқори сейсмик фаол ҳудудида жойлашган. Шу боис бу мамлакатларда ҳар йили юзлаб зилзилалар қайд этилади.

Эслатиб ўтамиз, саккиз ой аввал Филиппинда содир бўлган 6,9 магнитудали зилзила 79 кишининг ҳаётига зомин бўлган эди.