Францияда қимматчиликка қарши намойишларга 146 минг киши чиқди

Францияда яшаш харажатлари ва ёқилғи нархлари ошишига қарши оммавий намойишлар тўртинчи ҳафта кетма-кет давом этди. 2026 йил 7 ноябрь куни мамлакат бўйлаб ўтказилган намойишларда 146 минг киши иштирок этди. Бу ҳақда Al Jazeera нашри Франция Ички ишлар вазирлиги маълумотларига таяниб хабар берди.
Вазирлик маълумотига кўра, Парижда 46 минг киши кўчага чиққан. Бироқ касаба уюшмалари намойишчилар сони мамлакат бўйлаб 250 минг нафарни, пойтахтда эса 75 минг нафарни ташкил этганини билдирган.

Париж ва Лионда полиция намойишчиларга қарши кўздан ёш оқизувчи газ қўллади

Франция бўйлаб намойишлар ўтказилган куни жамоат тартибини сақлаш учун 70 минг нафар хавфсизлик ходими сафарбар этилган. Ички ишлар вазири Лоран Нуньес тартибсизликлар ва талончиликка уринишларга нисбатан полиция қатъий чора кўришини билдирган.

Парижда намойишчилар ва полиция ўртасида тўқнашувлар юз берган. CLPRESS ахборот агентлиги тарқатган видеоларда полиция ходимлари намойишчиларни тарқатиш учун кўздан ёш оқизувчи газ қўллагани акс этган. Шунингдек, видеолардан бирида полиция ходимининг намойишчига резина таёқ билан зарба берганини кўриш мумкин.

Франция полицияси маълумотига кўра, Париж майдонларидан бирида ахлат қутисини ёқиб юборган шахсни ҳибсга олиш вақтида тахминан 200 кишилик гуруҳ полиция ходимларига ҳужум қилган.

Мамлакат жануби-шарқидаги Лион шаҳрида ҳам полиция рухсат этилмаган намойиш вақтида йўлни тўсиб қўйган бир неча юз кишини тарқатиш учун кўздан ёш оқизувчи газ ишлатган.

Намойишлар талабалар ҳаракатидан бошланган

Al Jazeera маълумотига кўра, Франциядаги намойишлар сентябрь ойида мактаблардаги шароит ва ресурслар етишмаслигига қарши талабалар чиқишлари билан бошланган. Кейинчалик ҳаракат аҳоли турмуш даражасининг пасайиши, маошларни ошириш ва давлат хизматлари сифатини яхшилаш каби талабларни ҳам қамраб олган.

Ҳозирда намойишларда талабалар билан бир қаторда турли касб эгалари, ишчилар ва бошқа ёшдаги фуқаролар ҳам иштирок этмоқда.

Намойишлар Франциядаги навбатдаги президентлик сайловлари арафасида ўтказилмоқда. Сайлов 2027 йил апрель ойида бўлиб ўтиши белгиланган.

Шунингдек, 7 ноябрь куни сўл қанотдаги «Бўйсунмас Франция» партияси етакчиси Жан-Люк Меланшон Парижда тахминан 17 минг тарафдори иштирокида ўз сиёсий дастурини тақдим этган. У иқтисодиётни истеъмол харажатларини рағбатлантириш ва мавжуд молиявий ресурслардан фойдаланиш орқали ривожлантиришни таклиф қилган.

Муаллиф: Ҳасанбой ОЧУН