Ғазо секторидаги Исроил ҳужумлари қурбонлари сони 62 895 нафарга етди

2023 йил 7 октябрдан буён Исроил армияси ҳужумлари оқибатида Ғазо секторида ҳалок бўлган фаластинликлар сони 62 895 нафарга етди (27 август ҳолатига кўра). Фақат сўнгги бир кунда Исроил ҳужумлари қурбонлари 76 кишини ташкил қилди. Бу ҳақда Ғазо сектори Соғлиқни сақлаш вазирлиги маълум қилди.

Маълумотга кўра, сўнгги 24 соат ичида касалхоналарга 76 нафар ҳалок бўлган ва 298 нафар яраланган шахс етказилган.

18 мартдан, яъни 19 январда кучга кирган оташкесим келишуви бузилгандан бери Исроил ҳужумлари қурбонлари сони 10 050 кишига, яраланганлар эса 46 886 нафарга етди.

Сўнгги бир кунда ёрдам олишга ҳаракат қилган 18 фаластинлик ҳалок бўлган, яна 106 киши яраланган.

Шунингдек, жорий йил 27 майдан буён Исроил ва АҚШ назоратидаги «ёрдaм тарқатиш нуқталари»да амалга оширилган тизимли ҳужумлар натижасида 2158 киши ҳалок бўлиб, 15 843 нафари яраланган.

Жами 7 октябрдан буён ҳалок бўлган фаластинликлар сони 62 895, яраланганлар сони эса 158 927 нафарга етди.

Сўнгги 24 соат ичида эса Ғазодаги касалхоналарда очлик ва тўйинмасликдан 10 киши, жумладан болалар ҳам вафот этган. Шу билан очликдан ҳалок бўлганлар сони 313 нафарга етди, шундан 119 нафари болалардир.

Таъкидланишича, Ғазо секторидаги вайроналар остида ҳамон минглаб қурбонлар жасадлари қолмоқда.