Gʻazo sektoridagi Isroil hujumlari qurbonlari soni 62 895 nafarga yetdi

2023 yil 7 oktabrdan buyon Isroil armiyasi hujumlari oqibatida Gʻazo sektorida halok boʻlgan falastinliklar soni 62 895 nafarga yetdi (27 avgust holatiga koʻra). Faqat soʻnggi bir kunda Isroil hujumlari qurbonlari 76 kishini tashkil qildi. Bu haqda Gʻazo sektori Sogʻliqni saqlash vazirligi maʼlum qildi.

Maʼlumotga koʻra, soʻnggi 24 soat ichida kasalxonalarga 76 nafar halok boʻlgan va 298 nafar yaralangan shaxs yetkazilgan.

18 martdan, yaʼni 19 yanvarda kuchga kirgan otashkesim kelishuvi buzilgandan beri Isroil hujumlari qurbonlari soni 10 050 kishiga, yaralanganlar esa 46 886 nafarga yetdi.

Soʻnggi bir kunda yordam olishga harakat qilgan 18 falastinlik halok boʻlgan, yana 106 kishi yaralangan.

Shuningdek, joriy yil 27 maydan buyon Isroil va AQSh nazoratidagi «yordam tarqatish nuqtalari»da amalga oshirilgan tizimli hujumlar natijasida 2158 kishi halok boʻlib, 15 843 nafari yaralangan.

Jami 7 oktabrdan buyon halok boʻlgan falastinliklar soni 62 895, yaralanganlar soni esa 158 927 nafarga yetdi.

Soʻnggi 24 soat ichida esa Gʻazodagi kasalxonalarda ochlik va toʻyinmaslikdan 10 kishi, jumladan bolalar ham vafot etgan. Shu bilan ochlikdan halok boʻlganlar soni 313 nafarga yetdi, shundan 119 nafari bolalardir.

Taʼkidlanishicha, Gʻazo sektoridagi vayronalar ostida hamon minglab qurbonlar jasadlari qolmoqda.