Ғазо Соғлиқни сақлаш вазирлиги: Исроил 20 кунда 1100 фаластинликни ўлдирди

Вазирлик раҳбари Мунир ал-Буршнинг айтишича, зарбалар аввало Жабалия ал-Балад ва Незле ҳудудларидан бошланган, кейин эса Шайх Ризван, Аз-Зайтун ва Сабра маҳаллалари томонга кенгайган. Ҳужумлар Ал-Аҳли шифохонаси атрофига ҳам етиб борган.

Ал-Буршнинг таъкидлашича, минглаб турар-жой бинолари вайрон қилинган, тиббий муассасаларга ҳам зарба берилган. Жумладан, Шайх Ризван клиникаси ва бир нечта тез ёрдам машиналари йўқ қилинган. Бу эса аҳолининг тиббий ёрдамга бўлган эҳтиёжини янада ортишига олиб келган.

Унинг сўзларига кўра, фаластинликларнинг минглаб оилалари уйларини тарк этишга мажбур бўлган. Шу билан бирга, маҳаллий аҳоли катта озиқ-овқат ва дори-дармон танқислигида қолмоқда. 

“Оккупант Исроил халқаро ҳамжамиятни ёлғон маълумотлар билан чалғитиб, тинч аҳолига қарши геноцидни оқлашга уринаётир”, – деди ал-Бурш.

8 август куни Исроилнинг ҳарбий-сиёсий кабинети Ғазо шаҳрининг шимолини босиб олиш режасини маъқуллади.

Бош вазир Биньямин Нетаняҳунинг айтишича, мақсад бутун Ғазо сектори устидан назорат ўрнатишдир.

Исроил ОАВ маълумотларига кўра, армияга кейинги босқичга ўтиш буйруғи берилган, бироқ сентябргача режанинг амалга ошиши эҳтимоли паст.

Ҳужжатга кўра, биринчи босқичда тахминан 1 миллион фаластинлик жанубга сиқиб чиқарилади, шаҳар қамал ва кучли ҳаво зарбаларига учрайди, кейин эса босиб олиш бошланади. Иккинчи босқичда эса Ғазонинг марказидаги қочқинлар лагерлари устидан назорат ўрнатилиши кўзда тутилган, улар қаттиқ вайрон бўлиши кутилмоқда.

Эслатиб ўтамиз, Ғазо сектори 1967 йилдан 2005 йилгача 38 йил мобайнида Исроил оккупациясида бўлган. Ҳозир бу ҳудудда тахминан 2,3 миллион фаластинлик яшайди ва у 18 йилдан бери қаттиқ блокада остида қолмоқда.