Gʻazo Sogʻliqni saqlash vazirligi: Isroil 20 kunda 1100 falastinlikni oʻldirdi

Vazirlik rahbari Munir al-Burshning aytishicha, zarbalar avvalo Jabaliya al-Balad va Nezle hududlaridan boshlangan, keyin esa Shayx Rizvan, Az-Zaytun va Sabra mahallalari tomonga kengaygan. Hujumlar Al-Ahli shifoxonasi atrofiga ham yetib borgan.

Al-Burshning taʼkidlashicha, minglab turar-joy binolari vayron qilingan, tibbiy muassasalarga ham zarba berilgan. Jumladan, Shayx Rizvan klinikasi va bir nechta tez yordam mashinalari yoʻq qilingan. Bu esa aholining tibbiy yordamga boʻlgan ehtiyojini yanada ortishiga olib kelgan.

Uning soʻzlariga koʻra, falastinliklarning minglab oilalari uylarini tark etishga majbur boʻlgan. Shu bilan birga, mahalliy aholi katta oziq-ovqat va dori-darmon tanqisligida qolmoqda. 

“Okkupant Isroil xalqaro hamjamiyatni yolgʻon maʼlumotlar bilan chalgʻitib, tinch aholiga qarshi genotsidni oqlashga urinayotir”, – dedi al-Bursh.

8 avgust kuni Isroilning harbiy-siyosiy kabineti Gʻazo shahrining shimolini bosib olish rejasini maʼqulladi.

Bosh vazir Binyamin Netanyahuning aytishicha, maqsad butun Gʻazo sektori ustidan nazorat oʻrnatishdir.

Isroil OAV maʼlumotlariga koʻra, armiyaga keyingi bosqichga oʻtish buyrugʻi berilgan, biroq sentabrgacha rejaning amalga oshishi ehtimoli past.

Hujjatga koʻra, birinchi bosqichda taxminan 1 million falastinlik janubga siqib chiqariladi, shahar qamal va kuchli havo zarbalariga uchraydi, keyin esa bosib olish boshlanadi. Ikkinchi bosqichda esa Gʻazoning markazidagi qochqinlar lagerlari ustidan nazorat oʻrnatilishi koʻzda tutilgan, ular qattiq vayron boʻlishi kutilmoqda.

Eslatib oʻtamiz, Gʻazo sektori 1967 yildan 2005 yilgacha 38 yil mobaynida Isroil okkupatsiyasida boʻlgan. Hozir bu hududda taxminan 2,3 million falastinlik yashaydi va u 18 yildan beri qattiq blokada ostida qolmoqda.