Ғазода иситиш воситалари етишмаслиги болалар ўлимига олиб келмоқда

Совуқ об-ҳаво сабаб Ғазода яна камида уч нафар бола вафот этди. Бу ҳақда Фаластин соғлиқни сақлаш вазирлиги маълум қилди. 

Вазирлик маълумотларига кўра, қиш мавсуми кириб келганидан буён совуқ туфайли вафот этган болалар сони камида олти нафарга етган. Ғазода жойлашган Ҳукумат ахборот идораси эса можаро бошланган 2023 йил октябридан буён камида 21 киши, жумладан 18 нафар бола совуқ уриши оқибатида ҳалок бўлганини билдирган. Уларнинг барчаси вақтинча қурилган лагерларда яшаган.

Расмийлар совуқ ҳарорат анклавдаги вазиятни янада оғирлаштираётганини таъкидламоқда. Маълум қилинишича, бу айниқса болалар, кексалар ва бетоб инсонлар ҳаёти учун жиддий хавф туғдирмоқда.

Изғирин совуқ ва ёғингарчилик Ғазодаги гуманитар вазиятни янада оғирлаштирди.

Совуқ ва бошпанасизлик муаммоси

Қарийб икки йил давом этган бомбардимонлар оқибатида анклавда минглаб турар жой бинолари ва фуқаролик инфратузилмаси, жумладан шифохоналар вайрон бўлган. Ҳозирда тахминан 1,5 миллион ғазолик қишлаш учун яроқсиз бошпаналарда яшамоқда.

Исроил ўрнатган қамал сабаб ҳудудга чодирлар, вақтинчалик уй-жойлар ҳамда иситиш воситаларини олиб кириш чекланган. ҲАМАС бу ҳолат 2025 йил октябр ойида имзоланган ўт очишни тўхтатиш келишувига зид эканини бир неча бор таъкидлаган.

Халқаро ташкилотлар маълумотларига кўра, вақти-вақти билан кузатилаётган бўронлар сабаб 42 мингдан ортиқ чодир ва вақтинчалик бошпана зарар кўрган. Бу қарийб 250 минг ғазоликнинг ҳаётига бевосита таъсир қилган.

БМТнинг Фаластинлик қочқинларга ёрдам кўрсатиш агентлиги (UNRWA) вакили Жонатан Фаулер анклавдаги вазиятни “ҳалокатли” деб баҳолади. Унинг айтишича, қиш фасли нафас йўллари касалликларининг кўпайишига олиб келган, дори-дармонлар эса кескин танқис.

Ғазо шифохоналарининг аксарияти икки йил давом этган можаро оқибатида вайрон бўлган. Нассер шифохонасининг болалар бўлими раҳбари Аҳмад ал-Фарра дори-дармонлар етишмаётганини маълум қилган.