Gʻazoda isitish vositalari yetishmasligi bolalar oʻlimiga olib kelmoqda

Sovuq ob-havo sabab Gʻazoda yana kamida uch nafar bola vafot etdi. Bu haqda Falastin sogʻliqni saqlash vazirligi maʼlum qildi. 

Vazirlik maʼlumotlariga koʻra, qish mavsumi kirib kelganidan buyon sovuq tufayli vafot etgan bolalar soni kamida olti nafarga yetgan. Gʻazoda joylashgan Hukumat axborot idorasi esa mojaro boshlangan 2023 yil oktabridan buyon kamida 21 kishi, jumladan 18 nafar bola sovuq urishi oqibatida halok boʻlganini bildirgan. Ularning barchasi vaqtincha qurilgan lagerlarda yashagan.

Rasmiylar sovuq harorat anklavdagi vaziyatni yanada ogʻirlashtirayotganini taʼkidlamoqda. Maʼlum qilinishicha, bu ayniqsa bolalar, keksalar va betob insonlar hayoti uchun jiddiy xavf tugʻdirmoqda.

Izgʻirin sovuq va yogʻingarchilik Gʻazodagi gumanitar vaziyatni yanada ogʻirlashtirdi.

Sovuq va boshpanasizlik muammosi

Qariyb ikki yil davom etgan bombardimonlar oqibatida anklavda minglab turar joy binolari va fuqarolik infratuzilmasi, jumladan shifoxonalar vayron boʻlgan. Hozirda taxminan 1,5 million gʻazolik qishlash uchun yaroqsiz boshpanalarda yashamoqda.

Isroil oʻrnatgan qamal sabab hududga chodirlar, vaqtinchalik uy-joylar hamda isitish vositalarini olib kirish cheklangan. HAMAS bu holat 2025 yil oktabr oyida imzolangan oʻt ochishni toʻxtatish kelishuviga zid ekanini bir necha bor taʼkidlagan.

Xalqaro tashkilotlar maʼlumotlariga koʻra, vaqti-vaqti bilan kuzatilayotgan boʻronlar sabab 42 mingdan ortiq chodir va vaqtinchalik boshpana zarar koʻrgan. Bu qariyb 250 ming gʻazolikning hayotiga bevosita taʼsir qilgan.

BMTning Falastinlik qochqinlarga yordam koʻrsatish agentligi (UNRWA) vakili Jonatan Fauler anklavdagi vaziyatni “halokatli” deb baholadi. Uning aytishicha, qish fasli nafas yoʻllari kasalliklarining koʻpayishiga olib kelgan, dori-darmonlar esa keskin tanqis.

Gʻazo shifoxonalarining aksariyati ikki yil davom etgan mojaro oqibatida vayron boʻlgan. Nasser shifoxonasining bolalar boʻlimi rahbari Ahmad al-Farra dori-darmonlar yetishmayotganini maʼlum qilgan.